Chief Minister Pu Lal Thanhawla chuan Cancer hmuhchhuahna hmun tur Nodal Cancer Control Centre Mizoram (NCCCM), Aiawl Adventists Hospital, Ni Sarih Tlangah Vawiin khan a hawng.

Hawnna inkhawm Aizawl Adventists Hospital Conference Hall-a neihah Chief Minister chuan cancer hmuhchhuahna hmun tur hawn theih a awm ta chu a lawm tak zet a ni a ti a. Hei hi a chhan sawiin Mizoramah cancer vei kan tam em avangin cancer natna hmuhchhuah ran (early detection) hi a pawimawh em a ni a ti. Pu Hawla chuan khawvelah Mizoram hi cancer vei tamna ber kan ni hi a zahthlak a, hrisello ber kan ni hi Lal Isua hmel kan tibal a ni a ti a. Ei leh ina kan insum loh avang leh zuk leh hmuam kan ti nasa lutuk hian cancer hi kan cho chhuah ni te pawh a a hriat thu a sawi a. Kan Bible in 'in taksa ah chuan Pathian chawimawi rawh' a tih angin Mizote hian thianghlimna kan zir a ngai hle a ni a ti. Adventist ten thianghlimna an kal chhohpuina chu fakawm a tih thu a sawi bawk.

Chief Minister chuan tunhma kum 1994 daih tawha, tuna helai centre hawn theiha sulsutu, Dr.Suraj Verma leh Dr.Zoramthanga te nen Cancer Detection Society of Mizoram an lo din tawh thu sawichhuakin, khatih hunlaia Health Department lam hotute ngaihsak a hlawh loh avanga hna thawk theia a awm tak loh thu a sawi a. Tuna Adventists ten Dr Suraj Verma an thawhpui thei tur chu lawmawm a tih tak meuh thu sawi nawnin, department lamin lo bengkhawn vaklo mahse sorkar angin thawh ho a inpeih reng dawn a ni tiin, thawh hona turah mimal ang leh sorkar ang pawhin theihpatawp chhuah a ni ang Pu Lal Thanhawla chuan a ti.

Hawnna inkhawmah Dr.Eileen Lalrinpuii, Medical Director, Aizawl Adventist Hospital Secretary NCCCM chuan hetiang cancer hmuhchhuahna din tur hian kum 17 ngawt an lo beih tawh thu sawiin, tuna hawn tak pawh hi a mission bul tanna tur chauh a nih thu a sawi bawk a. Dr.Suraj Verma, President, Cancer Detection Society of India & NCCCM in keynote address a sawi bawk a ni.

NCCCM hawn denchhen hian Free Cancer Detection Clinic Hospital ah hian neih nghal a ni.

Attachment

  • Loading attachment...