Mizoram Consumers Union(MCU), Security Exchange Board of India (SEBI) leh Investors Protection & Education Fund (IPEF) inkawp buatsaihin vawiin khan NationalWorkshop on Disinvestment Policy & People Ownership of CPSEs chu Aijal Club-ah neih a ni.
He workshop ah hian Pu VN Gaba, Deputy Secretary, Department of Disinvestment, Government of India chuan India sorkar Disinvestment policy sawifiahin sorkar enkawl Central Public Sector Enterprises ah te mipuiin chanvo tam zawk an neih theihna turin sorkar in a chanvo titlem a, a hlawkna tam ber mipui kuta luhtir hi sorkar thil tum a ni a ti a. Public Sector Undertakings (PSU)hrang hrang a neitu nih hi India khua leh tuite chanvo dik tak a ni a, PSU te hi India ram hausakna tlingkhawm a nih angin mipui te kutah ram hausakna hi a lut tur a ni, tih leh, heng PSU ah te hian sorkar chuan a chanvo a tihtlem rualin a neitu lu ber ni turin 51% aia tlemlo chanvo a hauh reng ang a, a enkawlna kawngah pawh thuneitu ber a ni tur a ni tih te hi Disinvestment Policy thil tum langsar zual te a ni tih a tarlang a.
Pu VN Gaba chuan India sorkar hnuaiah PSU companies 50 a awm mek tih sawiin Department of Disinvestment chuan disinvestment atanga a sum hmuh chhuah hi kum 2009-10 ah vaibelchhe 23,553 leh kum 2010-11 ah vaibelchhe 22,763 lai a tling tih a sawi a. Sorkar-in Disinvestment atanga a sum hmuh chhuah te hi National Investment Fund ah lutin mipui hamthatna programme hrang hrang, Mahatma Gandhi National Rural Employment Guarantee Scheme te, Indira Awas Yojana, Rajiv Gandhi Gramin Vidyutikaran Yojana, Jawaharlal Nehru National Urban Renewal Mission, Accelerated Irrigation Benefits Programme leh Accelerated Power Development Reform Programme hna thawh nan te a vaiin hman a ni tih a tarlang bawk. Pu VN Gaba chuan India ram economy than duan dan enin mimal leh pawl hrang hrang te chu sorkar a inhawn angin PSU rintlak hnuaia sum peipun uar turin a sawm a. Hemi kawngah hian Bank thuneitute pawh Mizoram tan tan la turin a sawm bawk a ni.
Workshop kaihruaitu, Pu Thanglura, Co-ordinator chuan Mizo ten sum peipunna rintlak kan mamawh thu sawiin hemi kawnga inkaihhruaina leh inzirtirna tha kan mamawh thu a tarlang a. Workshop a tel, Aizawla Bank hrang hrang hotute leh NGO hruaituten Disinvestmet chungchang a zawhna an neihte chu workshop buatsaihtu ten chhangin sawihona hun neih a ni a. Pu Laldingliana Sailo, Secretary MCU chuan lawmthu sawiin hun hnung a khar a ni.
