Vawiin khan Pu Zodintluanga, UD&PA Minister chuan UD&PA Department officer te tun kum 2 kal ta chhunga hna an thawhnaah lawmthu sawina thingpui a office chamber-ah a inpui.
Pu Zodintluanga chuan hetianga UD&PA Department -in chak taka hma a lak theihna chhan chu hnathawktute inlungrual vang leh thawhhona that vang a nih thu a sawi a. A department officer te chu hna hrang hrang an thawhhonaah fakawm a ti a, thil hmanhmawhthlak tak tak tih zung zung ngaiah pawh rim taka an ti zung zung thin chu fak tlak an nih thu a sawi a. UD&PA hna hrang hrangah hna quality tha ngaipawimawhin department hming ziak lang ngam khawpin hna an enkawl a, hei hi entawntlak a tih thu a sawi bawk a ni. Mizoramin hma a sawn theih nana thawk an nih avangin thahnemngai taka an thawhna chu lawmawm a tih thu sawiin thahnemngai taka thawk chunzawm zel turin a chah bawk a ni.
Minister chuan Aizawl khawpui chhunga garbage trailer awm ta lo te, Public Private Partnership mode a bawlhhlawh paih a ni ta te, Aizawl khawpui lo fai tak dan te en hian department officers te thawhrimna rah a ni a, a lawmawm hle a ni, a ti a. Aizawl khawpui phei chu faina kawngah nasa takin a thang a, motor leh ke a kalte khawlaia bawlhhlawh paih mai mai hmuh tur an vang hle tawh a. Heng zawng zawng hi UD&PA Department officer te leh staff te thawhrimna liau liau a ni, a ti.
Mizoram hmun hrang hrangah miretheite tana in sak hna pawh kalpui mek a nih thu Minister chuan a sawi a. Mahni kutkawiha in leh lo din thei ngailo tur ten UD&PA Department kaltlangin in leh lo an din theih phah a. UD&PA Deptt chu mirethei te tan chuan malsawmna department a nih thu a sawi a ni. Minister chuan sorkar hmasaa thawh tawh, Aizawl khawpui chhunga mirethei in sak, Lawipu leh Chite a mi te chu tun thlengin sub-contractor ten an pawisa hmuh tur an la hmu thei lo chu a ngaihmawh thu a sawi a, sub-contractor ten an pawisa hmuh tur an hmuh vat theih nan department officers leh thawktute chu theihtawp chhuah turin a chah a ni.
UD&PA Secretary Pu RL Rinawma, IRS pawhin thu sawiin, department chu internet nena tangkawpa hnathawh a tul a. Central Ministry website te tlawh peih a, Mizorama kan tih ve theih turte zuk hriat zung zung a pawimawh thu a sawi bawk a ni.
UD&PA Department hian kum hnih kal ta chhung khan cheng nuai 43,992.80 Central sorkar atangin a la chhuak a. Heng pawisa te hi hmasawnna hna hrang hrang thawh nan a hmang a ni. Kum kalta chhunga he department in Scheme /Head hrang hrang hnuaia Central atanga sum a hai chhuah dan chu JNNURM ah cheng nuai 13,877.01, EAP-ah cheng nuai 1,617.24, Normal-ah cheng nuai 6,223.51, SJSRY (CSS) ah cheng nuai 1613.49, 10% Lump Sum Grant ah cheng nuai 18,917.44, Solar City-ah cheng nuai 13.04, Rajiv Awas Yojana-ah cheng nuai 467.07 leh Finance Commission Award-ah cheng nuai 1,264 te a ni.
