Chief Minister Pu Lal Thanhawla chuan ni 4 awh tur North East Games 2012 chu vawin chawhnu khan Rajiv Gandhi Stadium, Mualpui-ah NE Games Flag pawt pharhin a hawng.

Hawnna thuchah a sawi ah, Chief Minister chuan Mizoram aiawhin Games a tel zawng zawngte chu alo lawm thu a sawi a. India a State 23-na, kum 25 upa Mizoram hian hetiang hun, North East State zawng zawng telna Games a thleng hi ni chhinchhiah tlak, kan history a chuang reng tawh tur a ni a ti a. Hemi hun hmang thei tura rim taka tha leh zung chhuahtu, Sports Minister Pu Zodintluanga leh thawhpuite hnenah lawmthu a sawi a.Pu Zodintluanga hmalakna avanga khelmual 3 a phul lem phah a nih thu leh sports thenkhata foreign coach hial chah chhuah an nih thute tarlangin, catch them young policy hian rah tha tak a chhuah mek zel a ni a ti.

Chief Minister chuan hawnna inkhawm neihna mual hi Rajiv Gandhi hriatrengna atana a hming chawia sak anih thu sawiin, kum 2014 ah zawh fel tum a ni a ti a.India hmarchhak state te hian infiammi thalai tha tak tak a nei a ni tiin, khawvel hriat hlawh, boxing ah Mary Kom te, football ah Bhaichung Bhutia ten ram tan khawvel chawimawina an dawng hi kan chhuang a, anni ang hi thalai tam tak an la inphum a ni a ti.National level football ah hmarchhak thalai ten hming an chher chho mek a, sports discipline dang contact sports hrang hrang taekwondo, judo leh karate te bakah indoor games tam takah talent nei tha tak tak cho chhuah tur an awm a ni a ti.

Heng thalai talent neihte haichhuak tur hian sum tam tak mamawh a ni a, sports hmasawnna ruhrel awm ang angte pawh a enkawlna turte, infiammi training pekna tur atan te sum kan indaih lo hle a ni Pu Hawla chuan a ti a. National Sports Policy 2001 te hi harsatna hrang hrang vangin a puitlin theih loh a ni a ti. Hmarchhak State-te tana sports tih hmasawnna tur scheme. PYKKA hi district tin tan Rs.1 lakh ah tihsan a, state levelah Rs.3 lakh ah tihsan ni bawk se a ti a. Hei hi hmarchhak state zawng zawng ten central sorkarah thlen nise a ti a ni. Tun hun hi thalaite hun a ni a, an hmakhua ngaih pawimawh hi kan tih tur a ni a ti.

Chief Minister chuan infiammi zawng zawngte chu infiammi rilru, sportsman spirit pu chunga inel turin a chah a.Kan inpumkhatna dah chungnung berin, inunauna leh inthian thatna nen infiam turin Games a tel zawng zawngte chu a chah a ni.

Games hawnna neih hma hian Rajiv Gandhi Stadium bulah Chief Minister hian Multi Purpose Indoor Hall, Ministry of Sports under scheme of Urban Sports Infrastructure PYKKA sanction, Rs.754.60 lakhs senna tur lungphum a phum bawk a ni.

North East Games 2012 Organising Working Chairman Pu Zodintluanga, Sports Minister pawhin thusawiin, he games thleng tur hian sorkar chu nasa takin a inpuahchah a ni a ti a. Tun hmaa NE sports Festival tia kan thlen tawh thin, tuna NE Games tia vuah tak kan thlen vawi khatna a lo tel zawng zawng ten kan lo dawnsawn dan chungchangah kan phak tawk a ni tih min hriatpui turin a ngen a. Keini a thlengtu Mizote hian kan mikhualte chu zonun zemawi nen lo chhawn zel turin a chah a ni.

NE Games 2012 ah hian NE States zawng zawng 8 atangin infiammi an tel kim vek a. An vaiin infiammi 1006 leh official 180 an awm a ni.

Hawnna inkhawmah hian Assam Minister for Sports & Youth Welfare Ajit Singh pawh rawn telin, thusawina hun a hmang bawk a ni.