School naupang zirlai ten computer hman thiamna lama hriatna zau zawk an neih theih nan leh zirtirtu ten Information Technology (IT) lama hma an sawn theih nan North Eastern Council (NEC) senso tumin Zoram Electronics Development Corporation Ltd. (ZENICS) chuan Mizoram-a school 100 hnenah computer set 7 theuh a pe dawn a, tukin zing dar 8 khan IT Minister Pu Zodintluanga’n ZENICS Office, Treasury Square atangin Aizawl-a school 15 te hnena pek tur a vailiam. Minister chuan Department hotu ten chutiang project tha tak duan chhuah nachang an hriat avangin lawmthu a sawi a, zirlai tam takin an chhawr tangkai hle dawn a ni, a ti.

IT Education Programme hnuaia computer set sem ah hian School tinah Computer set 7 nos, Multifunction Laser Printer 1 no, Dot Matrix Printer 1 no, UPS 1KVA 4 nos theuh pek an ni a, Internet Connection (Broadband Modem) pek vek tura ruahman a ni bawk.