Mizoram Khadi & Village Industries (KVI) Board huaihawta ‘Rural Engineering Industry Awareness Camp’ chu vawiin khan I&PR Auditorium-a inkhawm buatsaih ah KVI Board Chairman Pu K. Lianzuala’n a hawng.

Pu K. Lianzuala chuan Rural Engineering Industry (REI) hi KVIC hmachhawp te zinga Mizo mipuiten an chhawr tangkai leh hmanthiam ber pawl a ni a, he industry hnuaiah hian Mizoram KVI Board pawhin Unit 1218 lai a tanpui tawh a ni, a ti. PMEGP hnuaia programme pawimawh tak pakhat Rural Engineering hian a tum ber chu hnathawh tur nei lo te tan hna pek a ni a, kut awl awm lova hnathawh chuan ram hmasawnna a thlen thin a ni, a ti bawk. Hmasawnna tehfung ber ‘per capita income’ tipung tur chuan thil dehchhuah lamah tan lak a ngai a, kum 2010-2011 chhung khan rampum per capita income chu Rs.53,331/- a nih laiin Mizoram-ah chuan Rs. 48,591/- a ni tih a tarlang bawk.

KVIC bultumin Rural Engineering Industry atan awareness camp te, workshop leh exposure visit te neih a ni thin a. REI hnuaiah hian PMEGP kaltlanga industry dil theih 50 vel a awm a. Chung zinga Mizoram tan bika lar zualte chu carpentry, blacksmithy, steel fabrication, motor engineering works, iron works, wood carving, aluminium leh copper utensil siam, rural transport vehicle, etc. te a ni.

Awareness Camp KVI Board Jt. CEO Pu Tinkhandala kaihhruaiah hian KVI lama mithiam engemawzatin thu an sawi a. KVI Board Unit hrang hrang aiawh leh zirlai sawm bik thahnem tak an tel a ni.