Khawvel ram hrang hrang ina an hman Olympic Day Run chu tukin zing dar 7:00 khan Mizoram State Olympic Association (MSOA) huaihawtna hnuaiah Aizawl Assam Rifles Lammual-ah hman ve a ni a, MSOA President Pu Lal Thanhawla, Chief Minister chuan a hmanpui. MSOA hnuaia sports discipline 17 atanga infiammi thahnem takin zing dar 6:30 ah Chanmari, Sikulpuikawn leh Vaivakawn atangte in A.R.Lammualah an rawn tlan khawm a ni.

Chief Minister Pu Lal Thanhawla chuan Presidential address a sawiah khaw chhe hnuaiah pawh infiammi thahnem tak an rawn tlan khawm chu ‘infiamna lama in tumruhzia a tilang a ni’ a ti a. Sports Association hrang hrang hotute avangin thalai ten hun tha an nei thei hi a lawmawm hle a tiin, thalaite chu hriselna ngaipawimawh a, tumruhna leh ram hmangaihna nen theihpatawp chhuah turin a ngen a ni.

Sports discipline hrang hrang atanga member za aia tam thawkchhuakte hnenah lawmman Rs.5,000/-, member 51-100 kalte hnenah Rs.3,000/- leh 10-50 kalte hnenah Rs.1,000/- MSOA Sr. Vice President Pu Zodintluanga, Sports Minister in a hlan bawk a. Chief Minister in a pumpuia member kal tam ber, member 134 kalna Wrestling Association hnenah Rs.7,000/- a hlan bawk a ni.

Olympic Day Run hi International Olympic Committee (IOC) ni 23rd June 1894 a din, ‘Olympic Day’ tia vuah lawmna leh hriatreng nan bakah Olympic movement chawikan leh chawinunna atan IOC ngenna anga khawvel ram hrang hrangina an huaihawt thin a ni a. Mi tupawh a hmeiapa, apui apang te telna tura ruahman thin a ni. Kum 1987 atanga hman tan niin, Olympic Day Run hi kumtin ni 17-24 June inkarah huaihawt thin a ni a, Km 1.5 vela thui tlan thin a ni. Mizoram bikah chuan kum 2005 atang khan kan hmang ve tan a ni.