Environment & Forest department buatsaih, Durtlang kham leh a chhehvel cheibawl, siam that leh humhalhna tur ‘Unique Landscape Development Programme in and Around Durtlang Kham’ chu vawiin khan Leitan YMA Hall-ah Chief Minister Pu Lal Thanhawla’n a hawng. Durtlang, Leitan, Bawngkawn leh Chaltlang Local Councilte a taka thawktu tur an nih angin sawm an ni.
Chief Minister chuan Durtlang kham leh a chhehvel ram hi Aizawl hmar lama hmun thengthaw nuam leh mawi kan la neihchhun a ni a, tichereu theitu leh kangmei lakah kan vena, a siam that leh humhalh hna hi sorkar chuan a ngaipawimawh hle a ni a ti a. Local Council ten neitu rilru pu a an ram enkawl theuh thehchhuak a, phur taka an rawn pen chhuak hi a lawmawm hle a ni a ti. Ram kan neih ang chhunte hi kan tan vek a ni tih hria a, neitu nihna chan changa kan cheibawl hi kan tih tur a ni a ti.
Kum 2008 khan Aizawl Development Authority (ADA) nen helai ram hi cheibawl a, khawthlir ti nuamtu atan Bawngkawn leh Durtlang inkara in hmun pek tawhte pawh cancel theih a ni em tihte an sawiho thu sawilangin, ‘tan la viau mahila a tih puitlin theih ta lo a ni’ Pu Lal Thanhawla chuan a ti a. Ram chu Lapa ta anih angin A duhdana kan cheibawl hi mitin tih tur a ni a ti a. Tunlai thangthar ten ram leh nungcha humhalhte, luia sanghate leh chungleng sava te duata humhalh duhnachang an rawn hre chho hi a lawmawm hle a, Pathian thil siam zawng zawng chunga chanchintha hril hi kan tih makmawh a ni a ti. Tunlai Zoram hmun thenkhatah ram leh nungcha, thing leh maute humhalhna YMA in a kalpui hi lawmawm atih thu a sawi bawk a ni.
Chief Minister hian hnathawhna tur Local Council te kaltlangin fund a hlan theuh bawk a ni.
Home Minister Pu R.Lalzirliana pawhin thusawiin tun hmalama sapel nasa thin anih thu a sawi a, tunah chuan thangthar ten sapel thinte an ngaihsan tawh loh thu leh ramsa te hmumhalh a pawimawhzia an rawn hria hi a lawmawm a, hun inthlak danglamin hun tharah kan chuangkai mek a ni a ti.
E& F Minister Pu Lalrinmawia Ralte chuan Durtlang kham hi hring mawi taka cheibawl tum anih thu leh hemi atan hian central sorkarah Environment & Forest Director General pawh an hmuh tawh thu a sawi a. Ram neitu dik tak mipuite hian kan ta a ni tih kan hriat thar a tul a ni a ti a.Local Council leh YMA ten an phurpui chu lawmawm a tih thu sawi bawkin,a cheibawl leh humhalh dan turte pawh mumal taka duan ani tawh a ni a ti a. Hemi programme (project) Green Mizoram chhunzawmna nipahfawmin, hriat awlsam nan Durtlang Kham Committee an tih mai thin a ni a ti. A hlawhtlinna turin Local Council leh YMA, mipuite an pawimawh hle dawn a ni a ti bawk.
PCCF Pu Lalram Thanga chuan ramngaw siam tha a nungcha te humhalh hna hi National Forest Policy leh National Forest Management zulzuiin, mipuite nen thawhho tur anih thu a sawi bawk.
Hawnna inkhawmah hian Speaker Pu Hiphei, bialtu MLA Higher & Technical Education Minister Pu R.Romawia, Parliamentary Secretaries Pu Joseph Lalhimpuia leh Pu H.Zothangliana te bakah E&F official te an tel bawk a ni.
Attachment
- Loading attachment...
