Tukina New Secretariat Conference Hall-a bul tan, sorkar inrelbawlna leh hmasawn nana vansang lam thiamna, space technology hmanruate hman tangkai dan sawihona, Ni Khat State Intawhkhawm, One Day State Meet on ‘Promoting Space Technology Based Tools and Application in Governance and Development’ chu chawhnu dar 4 khan a kharna hun Chief Minister Pu Lal Thanhawla chuan a hmanpui.

Chief Minister chuan he hun buatsaihtu Indian Space Research Organisation (ISRO), North Eastern Space Application Centre (NESAC) leh Mizoram Remote SensingApplication Centre (MIRSAC) chungah lawmthu sawiin,ruahmanna tha leh sorkar tha nei turin vansang lam thiamna hman tangkai a pawimawh hle a ni a ti a.Tunlai thiamna hmang tangkai thiam apiang ram hmasawn an nih avangin space technology hmang deuh deuh turin department hrang hrangte chu a chah a ni. He intawhkhawmna hian Mizoramah hmasawnna rah tha tak a neih ngei a beiseiawm a ni a ti a. Department hrang hrangten space technology an phak tawk ang zela hmang tura an inbuatsaihna chu a lawmawm tihthu a sawi a. Khawvela technology thang chak lutuk leh inthlakthleng zung zungna hi hman tangkai kan tum zel a tha tiin, MIRSAC hmalakna te chu a fakawm hle a ni a ti.

Vawiina theme session 4, Environment and Energy, Agriculture & Allied  departments, Infrastructure Planning leh Health and Welfare hnuaia department hrang hrangtena an hmalakna tarlan leh hmalak tur chhawpchhuahte chu Theme Chairman theuhte ten khaikhawmna neiin an hrilhfiah bawk a ni. Dr. M.A. Paul, ISRO Hqrs, Bangalore atanga lo tel chuan departement hrang hrang ten hmasawnna tura vansang lam thiamna hman an tum dan leh ruahmanna an neihte chu lawmawm a tih thu sawiin, he intawhkhawmna report atang hian ISRO in a puih theih dan kawng zawn sak anih tur thu a sawi bawk a ni.

He intawhkhawmna hi Prime Minister Pu Narendra Modi hmalakna bawhzuina a ni a. Kharna hun kaihruaitu Pu C.Vanlaramsanga, Secretary, Planning Department chuan he intawhkhawmna hi hmarchhak bialah a hmasa ber leh ala awm chhun anih thu a sawi a. Mizoram chu kum khat chhunga hetiang intawhkhawmna vawi 2 buatsaih thei awm chhun anih thu a tarlang bawk a ni.

He intawhkhawmah hian department hrang hrang aiawhte, ISRO Scientist te, NESAC leh MIRSAC Scientist engmawzah an tel a ni.