KVIC bultumin vawiin khan Saikuti Hall, Lunglei-ah ‘State Level PMEGP Exhibition’ huaihawt a ni a, Exhibition hawngtu Lunglei DC Pu Abhijit Vijay Chaudhari chuan Mizoram pum huap, industry thil siam phochhuahna PMEGP Exhibiton Lunglei hmun ngeiah a vawi khatna atan nghah a nih chu a lawmawm hle a ni, a ti.

Exhibition hawnna inkhawm Mizoram KVI Board CEO Pu Kaisangzuala kaihhruaiah Khuallian Pu Abhijit Chaudhari chuan ram hmasawnna innghahna bul ber chu ‘industry’a ni a, industry-a hmasawnna a chak loh chuan ram a thang chak thei lo a ni, a ti. Mizoramah hian industry lian chu awm lo mahse vawiina Exhibiton-a phochhuah thilsiam tenau awm chhunte hi ngai hlu thiam ila, anni pawhin tam lehzuala an siamchhuah zel theih nan dawr uar zel ang u, a ti. PMEGP Scheme-in a thil tum pawimawh tak chu thilsiam quality tihthat a, tam zawka dehchhuah theihna tura sum leh enkawlna tur lama tanpui ruahman bakah zau zawka Mizo thilsiamte ngei phochhuah hi a ni tiin district hrang hrang tanga Exhibition-a rawn telte chu midang thilsiamte ngun taka zir chungin an thilsiam theuh tihhmasawn tum theuh turin a chah a ni. Khuallian hian PMEGP hnuaia Training nei mekte hnenah Certificate a hlan nghal bawk.

He hunah hian General Manager, Industries Department Pi R.Lalrodingi pawhin sorkar-in mi harsa zawkte tana eizawnna ngelnghet an neih theih nana ruahmanna tha tak PMEGP hi mipuite zawkin an hmelhriat tawk loh thu leh duh angin an chhawr thiam lo thin chu pawi a tih thu a sawi a. Mizo ram leh hnam dinchhuahna tur chu kan thilsiam chhuahah a innghat thui hle a, chuvangin mipuite pawhin industry lama an tui chho a tul a ni, a ti. Mizo thilsiamte chu Mizo bawkin ngaisangin ngaihhlutna chang hria ila, Mizo kutchhuak leh thil zawrhte lei tamna chang kan hriat chuan industry a thangin hma a sawn ngei ang tiin kalkhawmte a fuih.

Vawiina hawn tak State Level PMEGP Exhibition hi March ni 8-15 chhung neih a ni dawn a; District hrang hrang atangin Stall 40 vel neih theih beisei a ni. Exhibition-ah hian PMEGP tanpuina hmanga industry bultan ten an thil dehchhuah hrang hrang an phochhuak ang a, mipui zawng zawng exhibition chhim turin KVI hotute chuan an sawm a ni.