Vawiin khan Chief Minister Pu Lal Thanhawla’n Peace Accord MNF Returnees Association (PAMRA) General Assembly vawi 7-na (II Session) chu Chanmari YMA Hall-ah khuallian niin a hmanpui a, Social Welfare Department enkawltu Minister Pu PC. Lalthanliana’n  khualzahawm niin he programme hi a hmanpui bawk a ni.

Chief Minister Pu Lal Thanhawla chuan PAMRA member te chu ram maichama a taka nunna thapa zalenna sualtu hnam sipai dik tak kalkawmte an nih thusawiin mi tam takin chhungkua, u leh nau te an chan a, rethei bakberh deuh ten an awm a, tam tak martar te an awm bawk a, remna leh muanna hi Pathian lam tang programme a ni a, Pathian duh zawng a ni a, Pa Hun tiamah chuan Mizoram Peace Accord kha a awm thei ta a ni, a ti a. Rambuai chanchin leh history dik tak hi hriat a tha a, thangthar tam takin an hriat fumfe loh avangin sawi a ngai thin a tiin ngaihnawm takin khatih hunlaia boruak inlumlet chhoh dan leh thil awm dan te, amah ngei pawhin a hmachhawn leh a tawn a te a sawi.

Pu Lal Thanhawla chuan thil kal tawh chu kal tawh a ni a, tiin remna leh muana man to taka kan lei hi ram leh hnam tan engtin nge tangkai taka kan hman ang tia ei leh bar, sum leh paia Mizorama intodelhna tur kawng kan ngaihtuah tlan hi thil pawimawh ber a ni, a ti a. Kum 20 chhung tah leh hathialna in min tlakbuak leh tuboh leh dolung inkara kan awm avangin kawng hrang hrangin kan rahbi  a tleu a, NLUP chu khang dinhmun siamthatna turin hun hmasa lama ngaihtuah chhuah leh kalpui a nih thu te a sawi a. Hmuhsitna leh sawichhiatna karah NLUP chu a hawlhtling chho zel a, tunah chuan UNO pawhin tha tiin Aizawlah pisa hial an hawng tawh a ni, a ti.

Inremna Thutlung ennawnna turah din ‘Review Committee on Memoramdum of Settlement (Peace Accord) 1986 chu tui thar tura hma lak mek anih thusawiin mithiam ten a Terms of Reference te an ngaihtuah mek a, an aiawh, a tuartu te ngei te pawh he Committee ah hian telh turin siamthat mek a ni tiin inhriatthiamna nen kalho a pawimawh thu a sawi a.  PAMRA, MURA leh Martar family te chu Chief Minister’s Rural Housing Scheme hmanga khuh vek tum a nih thu a sawi a. Pawl pawl ti lova, inphut zawng nilova infinchhuahpui zawnga kal tha a tih thu sawiin sawrkar tan sum harsatna avangtein vawi leh khatah thil a tih vut vut theih loh a ni tih te hi kan hriat tlan a tha a tiin mamawh inphuhru tawna beiseina nen kan kal a pawimawh a ni, a ti.

Minister Pu PC. Lalthanliana chuan PAMRA General Assembly in resolution an passed te chu lawmawm a tih thusawiin PAMRA hi political party a ni lo, a ti a. Martar te thlanmual chungchang sawiin a ropuina aiin martar chhungte mittui a hru hul em tih leh martar te hlutna a ti dal em tih hi ngaituahchian tha nia hriat thu a sawi. PAMRA zingah harsa tak tak leh khawngaihthlak tam tak an la awm thusawiin hengte hi a theih ang anga a lo tanpui thin ve tawh thu te a sawi bawk a ni.