Vawiin khan I&PR Conference Hall-ah langtlang sawrkar a awm theih nan leh mipuiten an chanvo an hriat theihna tura sawrkar hmalakna puanchhuahna Sawrkar TV Programme “Mizoram Hmasawnna Lamtluang” chu LPS Vision kaltlanga tichhuak turin Information & Public Relations Department leh LPS Vision Production ten I&PR Minister Pu Lal Thanzara hriatpuina in inremna thuthlung an ziak a, Sawrkar aiawhin Pu B. Lalthanliana, Secretary, I&PR in hming a ziak a, LPS Vision Production aiawhin Pu Lalsawmliana Pachuau, LPS Vision Director in hming a ziak thung a ni.

Pu Lal Thanzara chuan I&PR leh LPS Vision Production ten Mizoram sawrkar hmalakna te Mizoram mipuite hriat tura puangzar tura inremna thuthlung an ziak thei chu thil lawmawm tak ani a ti a, I&PR Department hian sawrkar thuchhuakte leh hmalaknate puanzar kawngah electronic media te nena thawhhona tha an neih a pawimawh em em a, Doordarshan Kendra, Aizawl nen thawhhona engemaw chen an lo kalpui tawh a, tunah LPS Vision in an thawhpui leh hi a lawmawm hle a ni a ti bawk. Pu Lal Thanzara chuan sawrkar Department hrang hrangte pawhin thahnemngai taka I&PR Department-a officer te nen tang tlang a an hnathawhte mipui hma a pholan dan ngaihtuah tam se a duh thu sawiin Sawrkar department hrang hrang hnathawh bakah kuthnathawktute hlawhtlinnate, NLUP hlawhtlinpuitute chanchin benglut tak tak he programme kaltlang hian tarlan anih dawn avangin midangte tana malsawmna thlentu a nih ngei a beisei thu a sawi bawk a ni.

Pu Lalsawmliana Pachuau pawhin tunhma atanga I&PR Department te nen thawhhona tha tak an neih thin thu sawiin kum 1991 khan Mizoram hmasawnna video magazine “Mizoram Today” chu VHS Cassette in I&PR Department nen an lo tihchhuah tawh thin thu a sawi a, Mizoram mipuite hian Mizoram hmasawnna hnathawhte an hriat hi an chanvo pawimawh tak ani tiin Sawrkarin a TV programme hlu tak tihchhuahna tura an hmang duh chu lawmthu a sawi a, theihtawp an chhuah dawn tih a sawi bawk a ni.

Mizoram Hmasawnna Lamtluang programme hi kumin January ni 15 khan Mizoram Chief Minister Pu Lal Thanhawla’n a hawng a, Doordarshan Kendra Aizawl kaltlanga tihchhuah thin niin sawrkar department hnathawh hrang hrang 98 chuang tihchhuah alo ni tawh a, sawrkar flagship programme NLUP dawngtu hlawhtlingte leh NLUP kaltlanga hmalakna te pawh kimchang zawka tarlan ziah a ni thin a, tun atang chuan DDK bakah LPS Vision kaltlangin tihchhuah ani tawh dawn a ni.

Mizoram Hmasawnna Lamtluang programme hi LPS 10 channel ah Pathianni zan dar 8:30 – 9:30 inkara tihchhuah thin a ni ang a, October ni 23, 2016 zan atanga tihchhuah tan ani ang.

Vawiin thawhhona thuthlung ziah inkhawm hi Pu David L. Thangliana, Chief Media Officer, NIB/I&PR in a kaihruai a, I&PR Department officer te, LPS Vision aiawhte leh thuthar thehdarhtuten an telpui a ni.