3162/2023-2024

Dated Thenzawl, the 22nd December, 2023: Vawiin khan Chief Minister Pu Lalduhoma chuan a bial chhung khua Thenzawla Police Training School atanga 69th Batch Constable leh 4th Batch Head Constable (Operator) te Passing Out Parade programme chu khuallian niin a hmanpui a, parade contingent te a endik zawha thu a sawinaah, "police te hmangin mi tam tak nunna, an tisa leh thlarau thlenga venhim sak kan tum a ni" a ti.

Chief Minister chuan, Police ka lo ni ve tawh thin a, in dinhmun tam tak hi ka hriatthiampui che u a ni. Police te hi in discipline a tha tur a ni a. Kum tin maia chawh ruala mi 100 chuang kan thi ziah thin hi mut mawh hnar mawhah kan neih a tul. Ka chhinchiah sual loh chuan tun hnai kum 7 chhung hian Battalion khat vel zet, mi 861 lai kan thi tling a, a rapthlak lutuk a ni. Police te kan zavaia kan tan tlan ka duh a, kan hriselna kan ngaih pawimawh a tul tak meuh a ni, a ti. Vawiin pass chhuak te pawh in vanneihzia hrereng turin ka chah che u a, in zingah duhsakna leh khawngaihna (compassionate ground) hmanga lakluh in awm tih ka lo hria a, ka lawmpui che u a. Chutihrualin chhawr tlak ni tura in tan mar lehzual a ngai hlein ka hria. Kan ram tan service tha ber pek tur a ni a, mahni invawngin, hotute thu awiin, zu leh ruihhlo laka insum tlat chungin kan hna kan thawk tur a ni. Kan ramah dan lova kuva ro tawlhruk te, drugs tawlhruk te, ralthuam tawlh rukte leh dan phal loh thil dang che vel a tam tih kan hria a, heng thil tha lo tawlh vel reng te hi sawrkar tharah hi chuan tihreh vek kan tum a ni. Chumi hnathawk tura kan kutke pawimawh ber chu nangni hi in ni a, in inpekna leh in thawhrimna hmangin mi tam tak nunna humhim a, an tisa leh thlarau thlenga venhim sak kan tum a ni, a ti bawk. Politics a luh hnuah pawh Police ten an duhsak hle thin tih a hriat thu tarlangin, lawmthu a sawi a. Hmasawn zel nana an thil mamawh hrang hrang te pawh a theih chin chinah sawrkarin a ngaihtuah sak tur thu a hrilh a ni. Chief Minister hian hlim leh hahdam taka Christmas leh Kumthar an hman theih nan pass tharte hi January ni 2, 2024 thleng chawlh (leave) a pe a ni.

Thu a sawi zawh hian training naa lawmman dawngtute hnenah lawmman a hlan bawk.

Vawiina Passing Out Parade nei te hi 69th Batch RC & 4th Batch HC (Opr) Basic Training te an ni a. Anni hi Compassionate Ground-a lak/recruit an ni. Dt.16.1.2023-ah Basic Training turin PTS-ah an lut a. A tirah chuan mi 284 in training hi an tan a, an zinga mi 13 te chu chhan hrang hrang avangin training chhunzawm thei lovin an awm a, vawiina POP thei hi mi 271 niin an zinga 116 hi hmeichhia an ni.

Pu Anil Shukla, DGP, Mizoram chuan he hunah hian inlawmna thu a sawi a. Chief Minister in a hmanpui theih avanga lawmthu sawiin, PTS Thenzawl chanchin tlangpui a sawi a. Vawiina training chhuakte a lawmpui thu a tarlang bawk a ni.

He hunah hian Pu F. Rodingliana, Minister of State, Power & Electricity,etc. leh Pu B. Lalchhanzova, Minister of State, Food Civil Supplies and Consumer Affairs dept, etc.,te chu khualzahawm an ni a.

Pu Anil Shukla, IPS, DGP, Mizoram,   Pu David Lalthantluanga, DC, Serchhip, Pu Lalbiakthanga Khiangte, IGP (Headquarters) Mizoram, Police official engemawzat leh district official pawimawh dangte, chanchinbumite leh mipui tam takin he hun hi an hmanpui a ni.