3163/2023-2024

Aizawl, 22nd December, 2023 : Vawiin chawhma dar 11:00 khan Directorate Disaster Management & Rehabilitation, Chawnpui ah Disaster Management and Rehabilitation Department in chhiatrupna lo thlen thulha hmanraw tangkai– Search & Rescue Equipment chu Deputy Commissioner Office/District Disaster Management Authority (DDMA) hrang hrang hnenah sem chhuah a ni.

Pi K Lalrinzuali, Secretary, Disaster Management and Rehabilitation Department chu khuallian niin he hun hi a hmanpuiin Mizoram State Disaster Management Plan, 2023 a tlangzarh a, DDMA te chu chhiatrupna a lo thlen thulh ah heng hmanrua leh bungrua te hi hmang tangkai a, tanpui ngai te tanpuitu ni tura theihtawp chhuah zel turin a chah a. District Emergency Operations Centre ah Equipment te chu uluk taka enkawl a, mamawh hunah lak chhuah mai theih turah dah turin a chah a ni.

He hun hi Pu Benjamin Lalzama, Director, DM&R in kaihruai a. District Organizer, District Disaster Management Officer te District tin atangin lo kal khawmin thuchah tawi sawina hun an hman hnuah Search & Rescue equipment chu Secretary, DM&R in a vailiam a ni.