900/2022-2023
Aizawl the 14th June, 2022: Chief Minister Pu Zoramthanga chuan vawiin khan Paulians' Proficiency Award 2022 semna, St. Paul's Higher Secondary School a buatsaih chu Chief Guest niin a hmanpui. Paulians' Proficiency Award hi HSLC leh HSSLC exam a zirlai tithate (rank holders leh subject topper-te) hnenah St. Paul's HSS hian a hlan thin a ni.

Chief Minister chuan zirlai hlawhtlinna changte chu a lawmpui thu sawiin, an hlawhtlinna chan chu a bultanna a ni tih hria in, hlawhtlinna tam zawk an chan belh zel theih nan tumruhna leh taimakna nen bei zui zel turin a chah a. Zirlaite bakah an zirtirtute leh an nu leh pate chu result tha tak tak an chan chhan nia a hriat thu a sawi a. Thalaite tan thlemna hrang hrang, a bik takin ruihtheihthil lama thlemna laka fihlim tura chah in, hlawhtlinna kawngah harsatna hrang hrang a awm thin tih hre chungin tumruhna nen a paltlang theih thu a sawi.

Brother PK James, Principal chuan kalkhawmte lawmna thu sawiin, Paulians' Proficiency Award hi kumtin buatsaih thin ni mahse, hripui leng avangin kum hnih chhung chu sem theih a nih loh avanga vawiin hian kum 2021-2022 batch te bakah 2019-2020 leh 2020-2021 batch te hnenah lawmman hi hlan a nih tel thu a sawi a ni.

Dr. Franklin Lalrinngheta, Paulians' Alumni Association aiawhin zirlaite fuihna thu a sawi bawk a. HSSLC 2022 topper (Science) Simon Lalremsiama Shangpliang chuan chawimawina dawngtute aiawhin lawmthu a sawi bawk.