899/2022-2023
Aizawl, 14th June, 2022 : Vawiin khan Mount Carmel School, Chaltlang chuan an zirlaite zinga kumin HSLC leh HSSLC Exam ti thate chawimawina hun Vanapa Hall-ah hmangin zirlai ti tha zualte chu tangka fai, Trophy leh Citation an hlan. He function hi Education Minister Pu Lalchhandama Ralte in a hmanpui a ni.

Khuallian Pu Lalchhandama Ralte chuan zirlai kal khawmte hnenah thu sawiin zirlaite tun huna midangte hlawhtlinna lawmpui a au te chu nakinah midangin an lawmpui ve theihna tura theihtawp chhuah turin a fuih a, hripui vanga zirna tlahniam chu kil hrang hrang atanga hmasawn tura nawr a pawimawh thu sawiin, thiamna leh hlawhtlinna hi a pawimawh rualin, Pathian tihna nen ram leh hnam tana theihtawp chhuah turin a chah nghal bawk a ni.

Mt. Carmel School hian kumin hian Matric exam zirlai 242 neiin 241 an pass a, Top ten 3 an nei a; Class XII Arts ah exam 129 neiin an vaiin an pass a, Top ten ah 4 an nei a; Class XII Commerce ah exam 19 neiin an vaiin an pass a, Top ten ah 1 an nei a; Class XII Science ah exam 185 neiin 179 an pass a, Top ten ah 2 (pahnih) neiin Subject Topper pawh an nei bawk a ni.

Mt. Carmel School hian an zirlaite nu emaw pa emaw an boral chuan fee chawi tawh miah lovin an zirchhuah hma chu an chhawm chhuak thina, Rawngbawltu (Pastor leh Missionary) fate reng reng fee chanve chauh chawiin an luh tir thin a ni.

Mount Carmel School hi 1987 a din niin kumin hi an sikul kum 35 tlinna a ni a, matric pass chhuak 3407 nei tawhin zirlai 4 chiah kum 35 chhung hian an la fail a ni. Tunah hian zirlai 1800 leh thawktu 92 an awm mek a ni.