898/2022-2023
Dated Serchhip, the 14th June, 2022: Vawiin khan Serchhip DC Meeting Hall ah Serchhip District Development Coordination & Monitoring Committee chu an chairman Pu C. Lalrosanga, MP, Lok Sabha hovin an thukhawm a, Serchhip district chhunga Central sawrkar sum hmanga hnathawh hrang hrangte an thlir ho.

Chairman Pu C. Lalrosanga chuan, DISHA meeting hi dan ang chuan thla thum dana neih thin tur a ni a. Nimahsela covid19 hripui vangin hun engemawchen mumalin kan kalpui thei lova, Parliament Session avangin han tawlh deuh a tul chang pawh a awm. Vawiin hian nikum financial year chhunga November atanga March inkarte, tun financial year kal mekah April leh May thla chhunga hmalaknate, kan thlen chin leh kan hmabakte, mamawh belh kan neihte kan en ho dawn a ni, a ti a. Er. Lalrinawma, Tuikum bialtu MLA, Deputy Speaker ni bawk chungah leh member dang kalkhawmte chungah lawmthu a sawi a ni.

Vawiina meeting hian Central Sponsored Scheme hrang hrang; MGNREGA, MzSRLM, SPMRM, BADP, PMKSY, SBM (Grameen) leh SBM (Urban), JJM, PMGSY, NFS, NHM, NSAP, SHCS, PMEGP, Samagra Shiksha, PMUY leh NGDRS hmalakna te thlirho a ni a. Hmalak tawh chin leh hmabak an la neihte a changtu department officer ten report pein, member kalkhawmten thil pawimawh nia an hriatte sawi zuina an nei a. Hmachhawp la awmte pawh chipchiar takin an thlirho zel a ni. A langsar zualah chuan; MGNREGA ah hian tun sawrkar kum kal mekah ni 36 inhlawhna siam tawh a ni a, Job Cards hi 15586 a awm mek a. Pradhan Mantri Krishi Sinchayee Yojana (PMKSY) hnuaiah hian Central a hmalakna chu project thehluh zingah Lungkawlh leh N. Vanlaiphai hmalakna tur an rawn pawm hmasaa, hnathawh tan mai tawh tur a ni. Jal Jeevan Mission (JJM) hnuaiah khaw 36 ah hmalak tura kalpui niin an zinga khaw 23 hi 2019- 20 leh 2020-21 ah hma lo lak an ni tawh a, tunah hian khaw 12 dangah te hnathawh chhoh mek niin, khaw dang 1 ah NABARD atanga hmalak chhoh tan mek a ni bawk. PMGSY hnuaiah hmun 13 a hnathawh zinga hmun 8 chu thawh zawh tawh niin, zawh fel mai tur pakhat a awm a, hmun thumah chak taka hmalak mek niin a dang pakhat erawh chu Contractor a boral avangin dan anga tharthawh leh tura kalpui mek a ni. National Food Security Act hnuaiah hian Serchhip district tan hian thlatin buhfai, AAY tan quintals 680, PHH tan quintals 2295.45 a vaiin quintals 2981.45 lak luh thin a ni a, Covid19 hripui vanga Central atanga tanpuina PMGKAY hmangin buhfai 2553. 80 quintals sem a ni bawk. Pradhan Mantri Ujjwala Yojana hnuaiah Gas connection mi 1383 te pek an ni tawh bawk. Nikum October atanga kumin May thla inkarah Infant Mortality Rate hi 13.8 a ni a, Maternal Mortality Rate hi 0 a ni.

Vawiina DISHA meeting hian 3rd National Water Award, 2020 dawngtu Sialsir khua an lawmpui thu leh hetiang lawmman hlu tak dawng thei khawpa hmalatu Public Health Engineering, Serchhip WATSAN Division chungah lawmthu an sawi a ni.

Meeting ah hian Member Secretary Pi Nazuk Kumar, IAS, DC Serchhip leh members dangte an tel a ni.