897/2022-2023
Lunglei the 14th June, 2022 : Vawiin chawhma khan Association for Voluntary Blood Donation (AVBD), Lunglei Branch, MSACS leh NSS Unit Govt Leitlangpuii HSS te tangkawp buatsaihin World Blood Donor Day 2022 pualin Govt Leitlangpuii HSS ah hun hman a ni.

World Blood Donor Day 2022 thupui hi ‘Donating Blood is an act of solidarity. Join the effort and save lives - A thlawna thisen pek hi inpumkhatna thlentu a ni. Lo pe ve la, nunna chhan him rawh’ tih a ni. He hunah hian Lunglei District chhunga a thlawna thisen pe tha, pawl leh mimal hrang hrang te chawimawi an nih bakah blood donation camp buatsaih nghal a ni.

World Blood Donor Day 2022 program AVBD Lunglei Branch Vice Chairman Pu Lalrammuana Chawngthu kaihhruaiah Lunglei Medical Superintendent leh Lunglei AVBD President ni bawk Dr SR Ngurchamliana chuan thu sawiin Mizoram hmun hrang hrang ah YMA, Zirna in, kohhran hrang hrang leh pawl dangte hmalaknain a thlawna thisen pek kan uar hi a lawmawm takzet a ni, a ti a. Lunglei District a blood bank pahnih - Civil Hospital leh Christian Hospital Serkawnah nikum chhung khan thisen unit 3557 lutin 98.48% chu a thlawna pek an ni tiin phal taka an thisen a thlawna pe tu mimal tin te leh hemi kawnga hma la thin tu pawl hrang hrangte chungah lawmthu a sawi a. Medical field ah hmasawnna hrang hrang leh hmanraw tha tak tak hmuhchhuah zel ni mah se thisen tluka nunna chhanna atana tangkai hi ala awmlo a ni tiin thisen pe thei tura mahni taksa leh hriselna enkawl uluk turin mipuite a chah a. Kalkhawmte chu a thlawna thisen pek uar deuh deuh tur leh mahni pek mai duh tawk lova midang te pawh thisen pek hlutna zirtirtu leh kawhhmuhtu ni theuh turin a chah bawk a ni.

Pu H. Lalthangliana, Secretary, AVBD, Lungei atangin report ngaihthlak a ni a. AVBD, Lunglei Branch hi 29th October 2001-ah din niin khawtlang tan leh damlo tan he pawl hi tha takin a kal chho zel a ni. AVBD hmalakna thenkhat sawiin damlo thisen mamawh ten thisen thianghlim tha dawn an neih theih nan kohhran thalaite, pawlte leh NGO ah te awareness campaign neih thin a ni a. Ni pual bik Valentines Day,World Blood Donor Day leh National Voluntary Blood Donation Day ah te thisen pekna hun siam a ni thin a, thisen pe tha te chawimawina hun hman ani bawk thin a ni.

Vawiin program ah hian Lunglei District chhunga thisen pe tha chawimawina hlan an ni a. Lunglei District-a hmeichhia leh mipa mimal thisen pe tam ber record chelh tu te - NG Lalbiakdiki, Bazar Veng Lunglei (30 Units) leh Lalhmingchhuanga Chhangte, Bazar Veng Lunglei (53 Units) te chu chawimawi an ni.

Hemi bakah June ni 14, 2020 atanga June ni 13, 2022 chhunga Lunglei District-a thisen pe tha te chawimawina hun pawh hman niin chawimawina dawngtute chu a hnuaia tarlan ang hi a ni.

I – CHURCH BASE
1st – Bazar Pastor Bial TKP – 304 Units
2nd – Chhipphir Pastor bial TKP – 145 Units
3rd – Adventist Youth Federation, Lunglei – 137 units

II – INSTITUTION BASE
1st – Lunglei Government College, NSS unit – 139 Units
2nd – BHSS Serkawn, NSS Unit – 67 Units
3rd – Govt Higher Secondary School Lunglei – 53 Units

III – NGO BASE
1st – Haulawng Branch YMA – 75 Units
2nd – Serkawn Branch YMA – 64 Units
3rd – Sub Hqrs YMA Hnahthial – 44 Units

IV – OTHER BASE
1st – John Williams Hospital – 87 Units
2nd – LDSC Lunglei – 68 Units
3rd – HQ COY 3(NH) BR Assam Rifles & B +ve Group Lunglei – 8 Units each

June ni 14, 2020 atanga June ni 13,2022 chhunga mimal thisen unit 6 pe chin pawh chawimawi niin Joseph Lalhrilmawia, Farm Veng, J. Lalrinenga, Ramthar leh NG Lalbiakdiki, Bazar Veng te an ni.

Kalkhawmte hian World Blood Donor Day 2022 pualin thutiam an sawiho a ni.

‘Vawiin World Blood Donor Day 2022 ah hian regular taka midangte tana thisen pe thin turin ka intiam e. India ramah thisen mamawhtu tam tak an awm avangin regular taka a thlawna thisen pek a tulzia hi ka chhungte, ka thiante, ka laichinte, ka hnathawh puite leh mipui zingah ka puangchhuak thin ang.Mi tupawhin thisen a mamawh chuan Sakhua leh chi inthliarna engmah awm lovin a thlawnin ka thisen ka pe ang. Kan chhehvela cheng mi tumah thisen petu hmuh zawh loh vanga an thih loh nan theihtawp ka chhuah zel ang.’

World Blood Donor Day 2022 pual hian Christian Hospital Serkawn Blood Bank chuan Baptist Higher Secondary School-ah Blood Donation camp an buatsaih bawk a ni.