896/2022-2023
Champhai, the 14th June, 2022: Vawiin chawhma dar 11:00 khan Champhai District Level Committee on SEDP chu DC Conference Hall-ah an Chairman Pu James Lalrinchhana, District Bawrhsap hovin an thukhawm a, Assembly Constituency 3; 23-Champhai North, 24-Champhai South leh 25-East Tuipui huamchhunga Village Level Committee on SEDP 68 ten Form-2 hmanga SEDP dawng tura rawtna an thehluhte zirchiangin an thlifim.

Bawrhsap Pu James Lalrinchhana chuan Sawrkar flagship programme pawimawh tak Socio-Economic Development Policy (SEDP) kalpui chhoh mekah hun bituk siama hmalak thin a nih angin khua leh veng atanga hamthatna dawng tur thlanchhuah tawh, District Level Committee-in a thlitfim turte ngaihtuahho tura inkohkhawm a ni, a ti a. Mawhphurhna nei zawng zawngte hamthatna dawng tura tihte aiawh an ni tih inhre thara thahnemngai taka thawk turin a fuih a. Bultan thatin kalzelna turah awmze thui tak a neih avangin a bulthum atangin fimkhur leh uluk taka hmalak a tul thu a sawi a. District Committee member-te chu inkaihhruainate ngun lehzuala zirchiang turin a chah a, hriatfiah leh zawh duh an neihin hotute hnena thlen hreh lo turin a fuih bawk.

He hunah hian Champhai District SEDP Nodal Officer Pu Lalnunfela Chawngthu, SDO Sadar hnen atangin hmalak tawh chinte leh hmachhawpte ngaihthlak a ni a. Village Level Committee on SEDP Chairman leh Secretary-te tan June ni 7, 2022 ah SEDP training buatsaih a nih thu leh siamthat ngaite a awm avangin Vilage Level Committee on SEDP hnen atangin nimin June ni 13 chawhma thlengin beneficiary list thehluh kim a nih thu a sawi a. Assembly Constituency tinah beneficiary 1,500 theuh thlan tur a nih angin khua leh veng tinah an neih theih tur zat hriattir an nih thu a sawi bawk.

Meeting-ah hian Assembly Constituency 3 hnuaia khua leh veng 68 atanga Village Level Committee on SEDP ten SEDP hamthatna dawng tura rawtna an siam Form-2 hmanga District Level SEDP Committee thlitfim tura an thehluhte chu uluk taka zirchian a ni a. Line Department leh Committee Member dangte atangin tul leh siamthat ngaite ngaihthlak a ni a. Siamthat ngaite tihfel a nih hnuah tanpuina dawng tur hian Assembly Constituency tin atangin mi 1,500 thlan chhuah niin, an vaiin mi 4,500 te thlan an ni a, District Level Committee on SEDP chuan Form-3 hmangin State level pawmpui turin SEDP Executive Board-ah a thehlut dawn a ni.

Thukhawmah hian Line Department-te chu an hnuaia trade hrang hrang awmte inkaihhruaina leh hmalak dan turte inhrilhhriatna ziaka siam theuh tura tih an ni a. SEDP bik atan Line Department leh Village Level Committee on SEDP te chu Savings Account siam theuh tura tih an ni bawk a. SEDP inkaihhruaina hrang hrang leh hmalak dan tur hmachhawpte ngaihthlaka zirho a ni bawk.

He hunah hian Pu B.Lalchhawntluanga, PD, DRDA & Member Secretary, SEDP Champhai District leh District Level Committee on SEDP, Champhai District member-te an tel a ni.