Vawiin khan Shivaji Tillah, Khatlaah Chief Minister Pu Lal Thanhawla’n Mizoram Police Headquarters building sak thar lung phum a phum. Home Minister Pu R.Lalzirliana, Environment & Forests Minister Pu Lalrinmawia Ralte, Opposition Leader Pu Vanlalzawma, Parliamentary Secretary pali - Lt Col(rtd)ZS Zuala, Pu H.Zothangliana, Pu Hmingdailova Khiangte, Pu K.Lalrinthanga bakah Law Commission Chairman Pu John Siamkunga leh Women Commission Chairman Pi Vanlalawmpuii Chawngthu te pawh he hunah hian an tel a ni.

Lungphum phum zawha Police Headquarters Arya Mess-a function buatsaihah thu sawiin Pu Lal Thanhawla chuan rampum huap pawha zahpuiawm loh tur khawpa changkang leh tha Police Headquarters building thar sakna bul tan a ni chu lawmawm a ti a. Phur taka thawk thei turin thawktute thawhna leh chenna hmun tha siamsak chu sawrkarin a ngai pawimawh hle tiin zawi zawiin siam that chhoh zel an tum tih a sawi. Chief Minister chuan police-te chu misualte tana tihbaiawm, thilthatitute tan erawh thian tha, mipuite tana thlamuanna leh a tul hun apiangah anmahni thlavang hauhva chhantu an ni tur a ni, a ti a. Kum rei vaklo chhungin Mizoram police in nasa takin hma an sawn a; mi sual, mi diklo leh helte raltitna ramah Mizoram an siam a, mipuite pawh an thla a muang hle a ni, a ti. Police-te chu hna thawk thei turin an fit a ngai a, mahni inthunun leh in vawng, hriselna ngai pawimawh mi an ni tur a ni, a ti a. Mahni inthunun kawnga hmasawn ngai tak Mizo hnamte tana entawntlak ni turin Chief Minister Pu Lal Thanhawla chuan Mizoram Police-te a fuih a ni.

Home Minister Pu R.Lalzirliana chuan kum tam tak kaltaa BRTF hovin building an lo sak tawh chu tun thlengin Police pisapuiah hman a la ni a, building changkang leh tha tak tura ngaih sak tan a ni ta chu lawmawm tiin a satute pawhin mahni hlawkna ringawt um lova Mizoram tana rotling building tha tak sa turin a sawm a. Remna leh muanna tel lovin ram hmasawnna hna a thawh theih lohva, helte tlangnel lohna ram ralmuang taka kan awm theih nan police-te thawhrimzia leh tan lak nasatzia a hmuhin duhsak an phu hlea a hriat thu a sawi a ni. Dan leh thupek kengkawh tur chuan dawhkan atanga rorel thei an ni lo va, police-te viak that dan a zirin sawrkarin mipui rin a hlawh chauh dawn a ni tih hriaa tan la thar turin Home Minister chuan police-te a awm a ni.

North East Consultancy Services (NECS) chuan nikum October ni 1 atang khan Police Headquarters building sak hna hi an thawk tan tawh a. NECS Chief Managing Director Pu Robert Romawia Royte tarlan danin building sak hna hi cheng nuai 1555.79 sengin thla sawmthum chhunga sak zawh tur a ruahman a ni a. A sakna tur sum hi DoNER Ministry hnuaiah hmuh niin 90% chu sawrkar laipuiin a tum anga 10% chu State sawrkar tum tur a ni. Building thar hian chhawng nga a nei anga, a chhungah hian police officer-te leh staff hrang hrangte office room tur ruahman a ni.

Programme hi Home Department Addl. Secy Pu Lalbiakzama’n a kaihruai a. Home Secretary Pi Renu Sharma chuan kalkhawmte lawmna thu sawiin Director General of Police Pu Thianghlima Pachuau chuan lawmthu sawiin hun hnung a khar a ni.