Vawiin chawhnu khan Parliamentary Secretary Pu Joseph Lalhimpuia chuan Govt Aizawl West College-ah Centre for Entrepreneurship Development (CED) a hawng.

Hawnna inkhawmah hian Pu Joseph Lalhimpuia chuan thu sawiin, mi thiam tam takin mi dangte tanpui ai maha sum leh paia hlawkna tur lam ringawt an ngaihtuah laia Govt Aizawl West College-in Mizo rilru dik tak pua mi dangte hlawkna tura centre a din chu lawmawm a tih thu a sawi a. Israel leh Arab indo (six-day war)-ah sipai tlem te nei Israel an chak chhan chu training an neih that vang a ni a; centre hawn thar pawh chu nakina zirlaite chakna tur leh hnathawh tur kawng an dap thiamna tur a ni tih sawiin, centre chu chhawr tangkai a, thahnem ngai taka zir turin zirlaite a fuih bawk. Virgin Group dintu Richard Branson-a thu sawi sawi chhawngin, Pu Joseph Lalhimpuia chuan sumdawnna chu bus ang mai a ni a, pakhat a liam pawhin a dang a rawn kal leh mai a, hmangchang hriatna leh remhriatna a awm phawt chuan hma lakna tur zau tak a awm a ni, a ti a. Ram mamawh sum deh chhuah dan zawn kawngah Aizawl West College-a centre hawn thar chuan mi tam tak tan kawng thar siamsak se a duhsak thu a sawi a; chuti ang centre hawn a ni ta chu Mizoram tan mel lung pawimawh tak a ni, a ti.

Centre-a Course Co-ordinator Dr Benjamin Lalrinsanga chuan conventional subject ringawtin thalaite’n hna an hmuh theih tawh loh avangin entrepreneurship lam hawi a ngai ta a ni, a ti a. CED Course Promoter Pu Joseph L Ralte pawhin thu sawiin, ram hmasawnna khawlpui chu entrepreneurship a ni a, ram hausakna hnar a ni. Chu lam kawngah chuan ke pen a nih hma chuan ram economy-in hma lam a pan lo vang, a ti bawk.

Centre for Entrepreneurship Development hawnna inkhawm hi College Principal Dr Laithanzauva’n kaihruaiin, Vice Principal Dr P.Lalremliana’n lawm thu a sawi a. College-a thawk teaching faculty leh zirlai thahnem tak an tel a ni.

CED-ah hian college zirlaite leh pawn lam mite tan entrepreneurship course hrang hrang kalpui a ni ang a, skill development pawh kalpui a ni ang. Kar leh atangin tlai dar 3-5 inkarah class tan tur a ni.