Mizoram Governor Lt Gen Nirbhay Sharma (Retd.) chuan Mizoram mipui 70% chu Agriculture & Allied Sector a in nghat a nih thu a sawi a. Buh leh bal a intodelh tur chuan tlangram leilung tana remchang Horticulture ah tan lak bik a ngaih thu Department of Horticulture, Aromatic and Medicinal Plants, MZU huaihawt International Symposium on Sustainable Horticulture kharna inkhawm ah  a sawi a. He symposium hi March 14 khan neih tan ni in technical session bik chu vawiin tlai ah khan Aijal Club ah khar a ni a, naktuk atang in symposium a tel te hi symposium tour neih pui a -  Horticulture a Mizoram sawrkar hma  lak mekna hmun te fan pui an ni ang.

Khawvel ram hrang 15 atanga mithiam lo kalkhawm leh India ram a Horticulture scientist te inkawmna atangin Mizoram loneitu te chuan  hlawkna an tel a beisei  thu Governor Lt Gen Nirbhay Sharma (Retd.)  tarlang a. Mithiam te inkawmna atanga rawtna tha tak tak te chu seminar ah tawp mai lovin loneitu te chhawr tangkai theih tura puanzar leh chhawp chhuah a pawimawh tih mithiam kalkhawm te chu a hrilh a.  State mipui ei tur buh leh bal, kum khat tla thar chhuah a nih theih nan Horticulture hnuaia thlai chin theihna hmun  zau zawkah hmalak a ngai a, chutih rualin thlai thar hralhna tur leh dahthatna tur ngaihtuah tel nghal pawh thlai thar tam a tul  tluk zet in a pawimawh a ni a ti. State Flagship programme, NLUP leh Central atanga tanpuina kaltlang in kuthnathawktu te chawikanna leh buh leh bala intodelhna kawng ah a hranpa ve ve a hmalak mek a nih piah lamah a pahnih a tangkawp in hmalak mek a ni a. Hlawhtlina chu muang chang deuhvin lang mahse Mizoram in buh leh bal a  intodelh state nih a hlat tawh lova a rin thu sawi a. Khawvel lum chho mek leh mihring chenna chhehvel chhe mek zel ah Mizoram pawh in tih tur a nei ve tih a sawi a. “Buh leh bal a intodelh ringawt ah lungawi mai lovin kan chenna leh a chheh vel enkawl uluk, ramngaw leh nungcha humhalh thlenga hlawhtlin Mizo mipui ten tum ila. Thangthar lo awm tur te tan chenna tlak ram nuam leh state intodelh ah Mizoram siam I tum ang u”, ti in Governor chuan ngenna a siam a ni.

Symposium kharna hun buatsaih hi Prof. A.C. Shukla, HOD, Department of Horticulture, aromatic & Medicinal Plants, MZU in a kaihruai a.  He hunah hian Pu R. Zotawna, Director, Director, Horticulture Department leh Dr. George Srzednicki, School of chemical Engineering, Food science & Technology, University of New South Wales, Sydney te pawh thusawina hun pek an ni. Symposium chhung hian thupui  7 ah mithiam ten  zirtirna vawi 70 an pe a.  India ram a Horticulture Scientist te bakah ram dang 15 atanga mithiam  lo kalkhawm te chuan symposium hi chhim in Horticulture tih hmasawnna kawng a inrawn khawmna leh sawiho na hun an hmang a ni.