4038/2023-2024

Dated Aizawl, the 2nd March, 2024: Vawiin khan Chief Minister Pu Lalduhoma chuan a chenna inah Pi Sushma Rawat, Director, ONGC (Exploration) chu a kawm.

Pi Sushma Rawat hi Chief Minister rawn hmu tur hian vawiin khan Delhi atangin a rawn kal a, a rawn thlen veleh inkawmna hi buatsaih nghal a ni.

Pi Sushma Rawat hian, Meiduma gas an hmuhchhuah tawh chu a lakchhuahna tur hmun tha, hmun hnih hmun thumah an thlang fel tawh a. Nimahsela, heng hmuna kan khawl te lakluhna turin Chhimluangtê luiah Mizoram sawrkarin lei a dawh mek a, hnathawh a muang avangin kan duh hunah hna kan tan thei lo, tiin lei dawh hi hmanhmawhsak turin a ngen.

Mizoram hmun thenkhatah lei chhung atanga gas irhchhuak a awm thu an sawi dun a. Heng gas irhchhuahna (seepage) te hi a rang lama tlawh chhuaha, zirchianna neih thuai ni se, an ti. He mi thuah hian Chief Minister hian, Mizoram chhunga gas/oil irhchhuahna hria apiangten; a awmna khua, lirthei kal theih chin atanga a hlat zawng,  a thalak emaw video tawi leh thil tul dang awm te ama social media kaltlangin emaw whatsapp number 8730970574 ah emaw email-ah cm@mizoram.gov.in ah thawn turin mipuite a ngen a ni.

Pi Sushma Rawat hian, Mizorama Oil/Gas lakchhuah hunah Mizo thalai geology lama thiamna neite tan hna a tam dawn hle tiin Chief Minister hi a hrilh a. He mi thuah hian Chief Minister chuan, Mizo thalaite Geology zirna lam lo uar tura ngenin, a zirna hmun pawh a theih ang a tihlen dan sawrkarin a ngaihtuah tur thu a tarlang a ni.

ONGC te hian, Mizo thalaiten Geology lam zirna an uar deuh deuh theih nan a tul anga Mizoram sawrkar thawhpui an inhuam thu an sawi a. An sum leh pai senga zirlaite tana field trip buatsaih te, zirlaite hnena training/interaction rawn pek te leh Dehradun-a ONGC Institute lama practical exposure buatsaihsak te pawh an inhuam thu an sawi a ni. He mi chungchanga indawr zui dan tur pawh an ruahman nghal bawk.

Pi Sushma Rawat hi Pu Suresh S. Mayal, Chief General Manager leh Pu Bipul Gohain, Assistant General Manager ten an rawn zui a. Chief Minister hi Pi R. Lalrodingi, OSD to CM leh Dr. H. Lallenmawia, Geology & Mining Department Director pension ta ten an tawiawm a ni.

Pi Sushma Rawat in Chief Minister a rawn hmuhna chhan hi February ni 11 a Delhi-a Chief Minister leh Dr. Pallavi Jain Govil, IAS, Director General of Hydocarbons, Ministry of Petroleum & Natural Gas, Exploration Strategies and Production Policy, Govt. Of India, inkawmna kal zel kha a ni.