Mizoram sorkar in  Plan Review meeting a buatsaih, a kharna hun vawiin chawhnua I&PR Auditorium-a neihah, Chief Minister Pu Lal Thanhawla chuan a hmanpui.

 

 

Chief Minister chuan a sorkar rawn luh hun chu sorkar hun tawp dawn hnaih, MP inthlan lo awm mai tur hmachhawn nimahse, administration leh financial inrelbawlna lam tawp tak mai chu thenfai vek a ngai hmasa dawn a ni,a ti a. Hetiang dinhmun awmna chhan ber pakhat chu politics hi eizawnna emaw,sumdawnna emaw kan tih thin vang a ni, a ti. Sum lama inrelbawlna felfai awmlohna ah sorkar tha leh langtlang sorkar a awm thei lo a ni a ti a. Sum hi anihna tur leh dik taka hman anih chuan rah tha a chhuah thin a, chuvangin, efficient spending capacity kan neih hi a tul a ni a ti. Pu Hawla chuan sorkar inrelbawlna tha tak awm  tur chuan Planning mumal leh felfai a pawimawh hmasa a tiin, kan project leh kan plan te hi a am tur a ni a ti. Chumi tur chuan statistics diktak neih a tul a ni a ti bawk a ni.

Chief Minister chuan Plan hlawtlinna chu department hrang hrangte thawhhona tha ah a innghat a ni ti a sawiin, Minister leh Officialte pawhin ka department chan a nilo ti lovin, a hlawhtlinna chu kan mawhphurhna vek anih avangin kan phurpui vek a pawimawh a ni a ti. Inrelbawlna tha nei tur hian a tul hunah sum renchen taka kalpui chang pawh a awm angai thin a ti a. Hetih lai hian Central sorkar thilphalna hi ngaichanga, kan hamthatna atan DPR te thehlutin, normal fund baka fund dang awmte atanga sum hai chhuak thiam turin kalkhawm official pawimawh tak takte chu a chah bawk a ni. Pu Hawla chuan a sorkar chu Dikna, Rinawmna, Taimakna, Huaisenn leh Thianghlimna nen a kal tur thu a sawilang bawk.

Plan Review inkhawm hi Planning Board Vice Chairman Pu Lalkhama’n a kaihruai a.Minister te leh Parliamentary Secretary engemawzat telin thusawina hun thenkhatin an hmang a. An ni bakah Chief Secretay Pu Vanhela Pachuau leh Secretary to Govt of Mizoramte, Deptt Head hrang hrangte leh Official pawimawh tak tak an tel a ni.