1811/2025-2026

Aizawl the 25th August 2025: August ni 23 khan Chief Minister Pu Lalduhoma chuan Aizawl Chawnpui vengah PM Ekta Mall (Unity Mall) SASCI 2023 - 24 sum Rs. 127 crore senga sak tur lungphum a phum. Pu Lalnghinglova Hmar, Tourism Minister, Pu F. Rodingliana, C&I Minister leh Pu TBC Lalvenchhunga, Adviser to CM ten Chief Minister hi an tawiawm.

A sakna tur hmuna lungphum a nih hnuah Chawnpui Sports Centre-ah Pi K. Lalrinzuali, Secretary, Tourism kaihhruaiin programme neih a ni a. He hunah hian thu sawiin Chief Minister chuan, PM Ekta Mall hi kum 2023-24 SASCI part 6 hmanga central sorkarin a rawn ruahman a ni a. Ram chhunga kan thilsiam chhuahte pho chhuahna hmunpui, International Market hawlh phaka kan kutchhuakte zawrhna tur a ni. Mizoram Ekta Mall-ah state hrang hrangin stall an rawn nei ang a, keini pawhin state hrang hrangte Ekta Mall-ah Stall kan nei ve bawk ang a. State tinah ‘India in one Mall’ sak a ni thluah dawn a. MAKE IN INDIA chawilarna a ni nghal ang.

One District One Products, Geographical Indication Product leh kan handicrafts-te thehlarna leh zawrh chhuahna hmunpui a nih dawn bawk avangin; Mizoram chhunga kan district tinin stall an nei ang. Tichuan, state leh UT te stall tur 36 leh kan district tinte stall tur 11, a vaiin stall 47 tal a awm ang a. Food Court, Restaurant, Children’s Play Area, Gaming Arcade, Meeting Hall, Movie Theatre, Retail Kiosks leh thil dang tam tak a awm bawk dawn a ni.

State 27 te hnena Project Cost pek zat a inang vek lo va, Mizoram hi Rs. 127 Crore pek kan ni a. Rs. 63.5 Cr. kan dawng tawh a, a lung kan phum ang a, kan sa zui mai dawn a ni. Kan sak zawh hunah chuan thalai 220 tan hna thar a siam thei tura ngaih a ni.

He Unity Mall sa tur hian Central sorkar Ministry of Health & Family Welfare hnuaia Public Sector Undertaking lar tak, HLL Infra Tech Services (HITES) te chu ruat an ni a. Project Management Unit atan Ministry of Finance hnuaia PSU IIFCL te thlan an ni. HITES hi hetiang sak lama sulhnu nei tha leh rintlak tak an ni a. Tunah hian Aizawl RIPANS pawh saw an sa mek a, Mizoramah an mikhual lo va, kan climate leh construction challenge dangte hre sa an ni. Hman ni lawk khan New Delhi-ah an hotute nen kan inkawm a. Sorkar duh dante chipchiar takin ka lo hrilh a. Hna tha kan duh a, chak taka thawh a, chhawr tangkai vat vat kan duh a, revised estimate ngai lo va thawh zawh ngei tum tur a ni, tiin chiang takin ka hriattir a ni, a ti.

Chawnpui veng khawtlang hruaitute, bialtu MLA Pu TBC Lalvenchhunga chungah te, a ram neitu ni thin Printing & Stationery Department chungah te leh Ekta Mall bultan a nih theih nana thawktute zawng zawng chungah lawmthu a sawi.

Pu Lalnghinglova Hmar pawhin thusawiin,  he hmuna sak a nih theih nan Minister a nih laiin Pu F. Rodinglianan Printing & Stationery hmunhma min pe a, Tourism Minister hmasa Pi Lalrinpuii kha a bul tantu a ni. Pu TBC Lalvenchhunga, Adviser to CM, bialtu MLA ni bawkin min tanpui nasa em em a. Chawnpui khawtlang an inhawng em em bawk. An zaa chungah kan lawm a ni, a ti.

Lungphum programme-ah dak zawh a nih huna a hmang tangkaitu tur Mizoram sorkar Board hrang hrang chairman te, sorkar official pawimawh te, Chawnpui khawtlang hruaitute an tel a, a satu tur HITES leh PMU IIFCL lam ten inhmelhriattirna an nei bawk.

Pi R. Lalrodingi, Director, Tourism chuan lawmthu sawiin inkhawm hi a khar a ni.