No.1008/2020-2020

Aizawl the 12th May, 2020: Nimin tlai khan Prime Minister Pu Narendra Modi hovin state tin Chief Minister ten Video Conference kaltlangin COVID-19 avanga ram pum lockdown kalpui mek leh hmalakna hrang hrang chungchangah sawihona an nei.

Mizoram Chief Minister Pu Zoramthanga chuan Mizoram chu mipuiin sorkar an tawiawm that avangin leh tlawmngai leh thahnemngai taka thawhhona avanga case pakhat bak nei belh lo a, tunah chuan covid-free state kan nih tak thu a sawi a. Chutihrual chuan he natna hrik lenna state leh ram dangin min Ia hual avanga lockdown chu kalpui chhunzawm zel a tul thu a sawi. Chief Minister chuan state pawna Mizoram mi leh sa tangkhangte an lo haw na turin rel/train ruahman thuai turin leh Mizoramah train station kan neih ve tawh avangin Bairabi thleng rawn phur lut ngei turin sorkar Iaipui chu a ngen a ni.

He meeting-ah hian Chief Minister 30 ten thu an sawi a. Prime Minister chuan he Novel Coronavirus hi a darh zual zel loh na tura hmalak zel a, chutihrual chuan ei leh bar kawnga hmalaknaah a him chinah chuan inthlahdul zel a tul thu a sawi a. State tin atanga rawtna awm te ngaihpawimawh a nih thu a sawi bawk.

He video conference hi CM Office atangin CM hian chhim in, Health Minister Dr. R. Lalthangliana, Home Minister Pu Lalchamliana, Chief Secretary, DGP, Health Department Secretary leh Home Department Secretary ten an tawiawm a ni.