1482/2026-2027

Aizawl the 22nd July 2026: Vawiin khan BSI Hall, Bible House-ah Chief Minister Pu Lalduhoma chuan Prof. Laltluangliana Khiangte chanchin mithiam hrang hrangte ziak dahkhawmna lehkhabu "Zawhzawzo Val" (FestsChrift - An damlaia mithiamte chawimawina lehkhabu) leh Prof. Laltluangliana Khiangte ziak lehkhabu dang pahnih - Lalzika leh Vanthangi, Sap tawnga ziak leh Teaching of Mizo Language in Secondary School, Dr. Lalramliana nena Sap tawnga an ziakte (co-author) a tlangzarh a, khualzahawm Prof. Dibakar Chandra Deka, VC, MZU chuan Pasaltha Khuangchera, Bengali tawnga ziak a tlangzarh bawk.

Thusawiin Chief Minister chuan, Prof. Laltluangliana Khiangte hi a thiamna leh a hnathawhna avanga Zofaten kan hriat lar em em a ni a. Zirna lama a sulhnu leh a hnathawhna lama a sulhnute atang ringawt pawh hian; thu leh hla lama a kutchhuak zawng zawngte hi nawtreh vek pawh ni ila, mi chhuanawm tak a ni tawh hrim hrimin ka hria. Hetiang mi, mi hratkhawkheng kan nei hi Zofate kan vannei hle a ni.

Kan ziakmite nen hian hun kan lo hmangho zauh zauh tawh a, ka ngaimawh thilte ka lo sawi ve thin a. Vawiina kan tlangzarh lehkhabu pahnih; Pasaltha Khuangchera Play leh Lalzika & Vanthangi Drama-te hi ka ngaimawh thil, ka lo sawi ve fo thin tihhlawhtlinna zinga mi an ni.

Mizo Literature hi hnam dang tawngin a tam thei ang ber letling ila, Sap tawng te, Hindi te, Bengali te, a theih chuan khawvela tawng lian dang dangte pawh hian letling ila, Internet khawvelah dah chhuak zel bawk ila, kan ram leh kan hnam phochhuahna tha tak an ni zel a, Mizo tawng kan humhalhna ni zel bawk a ni.

Tin, Mizo tawng hi Internet-a kan dahluh tam a tul a. Mizo tawng thumal leh chumi tlukpui Saptawng leh Hindi (a lehlinna) kan neih tam khan AI thiamna hmanga Mizo tawnga hna kan thawhna lamah min tanpui a. Hnam dangten Mizo tawng anmahni tawnga an lo lehlin zung zung theih nan a tanpui thin a ni. Kan hre theuhin ka ring a, kum 2022 atangin Google Translate chuan Mizo tawng hi an senglut ve tawh a, tunah chuan Google leh Language based AI zawng zawngte hi Mizo tawngin kan hmang ve thei vek tawh a. Hei hi khawvel changkang zelah kan mamawh em em thil a ni.

Prof Laltluangliana Khiangte hi Drama leh Play lama mi thiam bik a ni a. A thiam bikna lamah hian Mizoten mithiam kan ngah lo va. A hlu hle a. A kumte a la tam lo va, lehkhabu tha tak tak ziak zel turin ka ngen a, a kal zelna turah duhsakna a hlan a ni, a ti.

Khualzahawm Prof. Dibakar Chandra Deka, Vice Chancellor, MZU pawhin thu a sawi a ni.

Prof. Laltluangliana Khiangte hi India ram dung leh vangah Mizo Scholar dangte kal lohna hmunah Mizoram aiawhin a kal tam a, ram pawnah pawh a kal zel a. Christian & Secular lamah pawh ni se, Mizo Culture, Language, Literature leh Social Issues-te tawng dangin a vawrh darh nasa a. A zarah Zofate pawhin hmingthatna hi kan ngah tawh a ni.

Zawhzawzo Vala a lan danin, Play a ziak 40 zinga 20 hi Hindi tawnga lehlin a ni tawh a, 10 hi Sap tawnga lehlin a ni a. A play ziah 20 vel leh a thu (prose) ziah 20 vel bakah a hla chhammi (poets) 10 hi India rama University hrang hrang panga velin an zirlaibuah an khunglut tawh a, tawng hrang hrangin an letling hlawm bawk a ni.

Lehkhabu tlangzarh inkhawm hi Dr. R. Zothanliana, Associate Professor, MZU chuan a kaihruai a, Rev. Dr. Vanlalnghaka Ralte chuan hunserh a hmang a, Prof. Laltluangliana Khiangte chuan inlawmna thu sawiin, mithiam thlan chhuahten lehkhabu thlirna tawi an nei bawk.