1481/2026-2027

Lunglei, 2026 Vawkhniahzawn thla ni 22: Vawiin khan Lunglei DC Conference Hall-ah Lunglei District Bawrhsap Pi Navneet Mann hovin Lungleia Independence Day 2026 hman dan tur rel a ni a. Sawrkar official-te, zirna in, pawl hrang hrang leh kohhran ai awhte an tel.

Chairman Pi Navneet Mann chuan ram ni pawimawh chu ram mipui zawng zawng ta a nih angin urhsun taka hmang tur leh ngai pawimawh turin kal khawmte leh District mipuite a chah a. Independence Day hlawhtling taka hman a nih theih nan department, zirna in, pawl, kohhran leh mimal chanvo leh mawhphurhna pekte chu an chanvo ṭheuh ṭha taka hlen chhuah tum turin a chah.

He ṭhut khawmah hian kum hmasa lama Lungleia ram ni pawimawh hman ṭhin dan tlangpui zul zuiin kum 2026 Independence Day hman dan tur hi ruahman niin, department leh tlawmngai pawlte kovah mawhphurhna hrang hrang nghah a ni.

Meeting chuan kumin Independence Day lawmna hi C. Ṭhuamluaia Mualah August ni 15, 2026 (Inrinni) zing dar 9:00-ah hman ni se, tiin a rel a. Mizoram Health Minister Pi Lalrinpuii chu khuallian tura beisei a ni a. Independence Day lawmna ceremonial parade buatsaih ṭha tih niin, ruahmanna siam turin SP leh DEO te kutah mawhphurhna dah a ni a. Muala hun hman zawhah Circuit House-ah 'VIP At Home' inkawm hona buatsaih ni se, tih a ni.

Lunglei District-a chhawmdawlna in leh damdawi in thlan bikah te Independence Day pual ṭanpuina thilpek pek leh ṭha tih niin, kohhran leh NGO-ahte Independence Day lawmnaa tel tur leh a hun su buai zawnga thil dang huaihawt lo tura ngenna thlen leh ṭha tih a ni a. Sports discipline ṭhenkhat aṭanga Independence Day 2026 puala inelna (tournament) buatsaih tura dilna lut ṭhenkhat chu pawm a ni bawk.

Independence Day ni-ah hian sawrkar office, zirna in leh sawrkar quarters-ah te India ram puanzar zar vek tura tih a ni a. Sawrkar hna thawkte chu Independence Day lawmnaah hian tel ngei tura beisei niin, mipuite pawh Independence Day lawmnaa tel vek turin Lunglei District Independence Day Celebration Committee chuan a sawm a ni.