New Economic Development Policy (NEDP) hnuaia Sorkarin ruihtheihthil laka thalaite an fihlim theihna tura ruahmanna thar “Project Himna – MADAT (Mizoram Against Drugs, Alcohol and Tobacco)” a duan chu vawiin khan Mizoram Chief Minister Pu Lal Thanhawla chuan I&PR Auditorium-ah a tlangzarh. He Project hi Aizawl DC Office kaltlanga Pilot Project duan niin, Upper Primary School zirlai chin chunglam a huam a ni.

Chief Minister chuan Mizoram chu kawng hrang hrangah inchhuanna tur nei mah ila a thalo leh duhawmlo lamah India rama a ‘ber’ nihna kan hauh erawh chuan nasa zawka hriselna kawngah hma kan lak tulzia a tilang a ni, a ti a. Ruihhlo leh ei leh in lama fimkhur loh avanga cancer leh natna dang khirh tak tak Mizo zingah vei an tam thu te, mipat hmeichhiatna inthlahdah avang leh ruihhlo vanga HIV leh AIDS hluar em em thu te leh naupang kumtlinglo khuaikhem vanga POCSO Act hnuaia case tam lutuk zawng zawngte chuan insiamthat kan mamawhzia a tihlan thu a sawi a, vaihlo leh ruihtheihthil dopui beih tharna MADAT duan a ni chu lawmawm a tih thu leh a hlawhtlin ngei a beisei thu a sawi a ni.

Chief Minister chuan State economy hmasawnna tura sorkar hmalaknate hi hlawhtling tak tak tur chuan mipui an hrisel a pawimawh hmasak thu tarlangin, infiamna lama ‘Catch them Young’ kan hmang tangkai ang bawkin nun kawng tha leh thianghlim inzirtirna lamah pawh he policy hi a tangkai tho thu a sawi a. Zirtirtute hi naupang kaihruai a an nun hneh thei ber an nih avangin zirtirtute pawh an nun an uluk a role model tha tak an nih a pawimawh thu Pu Lal Thanhawla chuan sawiin, chumi atan chuan NEDP hnuaiah zirtirtute tan training programme ngaihtuah tha a tih thu a tarlang a. Mizoram hrisel siam turin a chhunga cheng tupawh tanrual a pawimawh thu a sawi a ni

Vawiin hunah hian MADAT hmalakna puala Aizawl District chhunga school hrang hrangte Project hming phuah intihsiakna buatsaih a titha zual pathum te hnenah lawmpuina thuziak leh pawisafai hlan a ni a. Chungte chu 1st Prize - Lalruatfeli (Class-VI), Zuangtui M/S; 2nd Prize – Lalruatfela (Class-VIII), Govt. M/S Samlukhai; 3rd Prize – Lalrindiki (Class – VII), Govt. M/S-I Saitual an ni. Mi 13 hnenah Consolation prize hlan a ni bawk.

Project HIMNA – MADAT hi Aizawl District chhunga school thlanbikte ah kalpui tur niin, mipui cheng zat tam avang leh ruihtheihthil ti an tam avangin he project enchhin nan Aizawl District chu thlan a ni a. Health & Family Welfare, Education leh Social Welfare Department te bakah , Anti-Tobacco  leh Anti-Drug Abuse lama tlawmngai pawlte nen tanghovin Aizawl DC kaihhruaina hnuaia hmalak a ni a. A project hmalakna zingah hian naupang zingah ruihtheihthil avanga an chunga thil thalo thleng thei hrang hrang inhrilhhriatna neih te, school-a Anti-Tobacco/Anti-Drug Abuse Club-te din te, Art competition buatsaih te, pamphlet, poster, sticker leh complaint board siam te, zirna in bulhnai a vaihhlo leh ruihtheihthil eng chi mah zawrh phallo tura hmalak te, Public Education campaign buatsaihte leh zirlaite hriatna tizau tura hospital tlawh programme siamte bakah zirlai nu leh pate zingah leh zirtirtute zinga vaihhlo nghei uar tura hmalak te a tel a ni.

Project Himna tlangzarhna inkhawmah hian Dr. Jane R. Ralte, State Nodal Officer, State Tobacco Control Society hnen atangin leh Aizawl DC Pu Kannan Gopinathan hnen atangin thusawi ngaihthlak a ni bawk a. Pi Vanlalhruaii, Principal, IASE & Convener, Research & Documentation Sub-Committee chuan report pe in, Pi Lallianzuali Bawihtlung, DPC, SSA, Aizawl District chuan lawmthu sawiin hun hi a khar a. Chawhnu lamah Aizawl District chhunga sorkar leh private school 50 thlanchhuah a zirtirtu thawk mek te tan training programme buatsaih a ni bawk.