DM&R Minister Pu C.Ngunlianchunga chuan vawiin khan Lawngtlai khawpui chhunga fur ruah sur vanga chhiatna thlenna hmunte chu harsatna hrang hrang chin fel dan tur ngaihtuahin a tlawh kual.

DM&R Minister hian Lawngtlai-III a lei tlak hniamna thin, kumina rawn che nawn leh chu tlawhin, he lai lei che hian National Highway-54 chu a nghawng tel avangin thuneitu lam chuan lirthei lian chi tlan an remti lo va. He lei khi hi kum dang aiin a zau deuh niin a lang a, tunah hian chhungkaw 8 chu hmun dangah an riak chhuak mek a ni. Hei bakah hian Lawngtlai AOC venga lei khi zau tak awm chu Minister hian a tlawh bawk a. BCM Kanaan Kohhran biak in chhung khi bakah, Primary School leh YLA Hall chhung khi pawh Minister hian a en bawk. Thingkaha lei chetna hmunte tlawh bawkin, Minister chuan tun dinhmunah chawpchilh taka a ven hna thawk turin tih theih tam lo mah se, mipuite chu thlaphang lo tura chahin, sawrkarin a theih ang anga a enzui tur thu a sawi a. District Council thuneitute pawh lo sawipui a tum thu a sawi.

DM&R Minister Pu C.Ngunlianchunga chuan leilunga khuarel chhiatna thleng thin hi mahni lo inven lawk chuan pumpelh theih a awm nual tih sawiin, he’ng lei chetna hmuna awmte chu tuidawn mumal tak leh tuichhe paihna tha zawk siam turin a chah a; hei hian lei min leh lei tla hniam tur chu eng emaw chen a veng ve thei a ni, a ti.

Minister hi a tlawh venga VC leh YLA hruaitute’n lo dawng sawngin, Lawngtlai Election Officer, DM&R Nodal Officer ni bawk Pu Lalrinawma bakah Lai District Congress Committee hruaitute’n an tawiawm bawk.