Vawiin khan Chief Minister Pu Lal Thanhawla chuan Project Pushpak hotute chu Chief Minister's Conference Hall-ah a kawm a. He hunah hian ramri hrula kawngpui leh ramri pana kawngpui siamthat hna Border Roads Organization (BRO) in a thawh tur chungchangte an sawi a.BRO hotute hian an hmalakna tichak tura Chief Minister puihna leh bawhzuipui ngaite Chief Minister hnenah hian an thlen nghal a ni.

Pushpak hotute chuan Chief Minister Pu Lal Thanhawla chu an hmalak mek, an thlen chin a harsatna leh hmachhawp bakah rawtna Central sawrkara an thehluh te PowerPoint hmangin an hrilhfiah a. Pushpak official te tarlan dan chuan BRO in Mizoram chhunga kawngpui a siamtur leh siamthat tur zinga pawimawh deuh te chu :

Rs 600 Crore senga siam tur KM 60 a thui - Kawnpui - Durtlang - Aizawl (K-D-A) Road leh Km 93.4 a thui, Rs 935 Crore a siam tur, Sairang - Tuipuibari (S-T) Road te an ni. KDA Road hian Kawnpui to Aizawl kawnghlui zawh in Sihphirah pengin Muthi Tlang a vehkual hnuah Aizawl to Seling Road chu Tuirial Airfield bulah a pawh dawn a. He Aizawl Bypass road KDA hian Aizawl khawpui a chhun pelh hian Aizawl khawpui tan thanna tur hmun a siam dawn bakah Sipai leh an bungrua te rang taka phurhkualna hmun remchang a siam turah ngaih a ni a. KDA ah hian Compensation atan Rs180.00 Crore a ngai dawn a ni. S-T Road hian Sairang (Buichali) atanga intan in Tuipuibari (Rajiv Nagar) khua a pawh dawn a; khawtlang lam panna kawngpui pawimawh tak a ni mek a, he kawng siamnaah hian Compensation atan Rs281 Crore sen a ngai dawn a ni.

Heng kawngpui pahnih dinhmun leh hna tan theih hun leh harsatna awm mek te hi chipchiar taka sawi ho niin Chief Minister Pu Lal Thanhawla chuan kawngpui siam hna chu a rang lam a thawh a nih theihna kawng zawnpui a tum thu Pushpak hotute hi a hrilh a ni.

KDA leh ST road bakah hian BRO kaihhnawih kawngpui Ministry of Defence in ramri venna atana pawimawh nia a ngaih te chungchang pawh sawiho a ni a. Heng kawngpuite hi North Vanlaiphai to Thingsai ( NVT) Road leh Dungtlang- Vaphai- Farkawn (DVF) Road te an ni.

Project Pushpak aiawh hian Chief Engineer Brig.Birender Singh leh a thawhpui Engineer te an rawn tel a Principal Secretary Pu Lalram Thanga'n Chief Minister hi a tawiawm thung a ni.

Attachment

  • Loading attachment...