Vawiin khan Mizoram Governor Lt. Gen. Nirbhay Sharma PVSM, UYSM, AVSM, VSM (Retd.) leh Lady Governor te chuan Solomona Temple an tlawh a. Kohhran Thianghlim rorelna sâng ber, Executive Committee Chairman, Dr. L.B. Sailo leh a member pui ten an lo dawng sawng a. Governor leh a nupui chuan group hrang hrang thil cheimawite an fan kual bakah, Temple chhûng leh a velte ngun takin an en a ni.

Governor chuan, “Mizo mipui zawng zawngte christmas leh kumthar chibai kan bûk a che u. Mizo mipuite hi kan ngaina a, in zinga awm hi nuam kan ti a. Kohhran inrelbawlna felfai tak nena Temple-a thil inbuatsaih hian min ti lawm hle a. Inhmangaihna, inlungrualna leh dawhtheihna te hian Mizo khawtlang a ti nuam a, hei hi khawvel pawhin tun huna a mamawh ber chu a ni. Sakhua, chi leh hnam bil awm lova inlungrualna hian hmasawnna nasa tak a thlen thei a ni,” a ti.

Lady Governor Pi Jyotsna Sharma pawhin, “Krismas leh Kumthar hmang tura ka rawn haw chho leh thei hi ka lawm hle a, Mizo mipui zawng zawngte he hunah hian chibai ka buk a che u. Piang nawn leh thei ni ila, Mizoram ngeia pian hi ka duhthusam a ni,” tiin a sawi bawk.

Kuminah hian group hrang hrang 15 ten theme hrang hrang siamin, an thil cheimawite an pho chhuak a. Heng cheimawite hi October thla-a an neih, Coronation Day–2017 denchhena an buatsaih a ni. Solomona Temple hi ni 25.12.2017 hian a hawnna hun neih a ni dawn a, hemi pual hian Krismas theme-a cheimawi chhunzawm leh a ni.