2791/2022-2023
24.11.2022: Chief Minister Pu Zoramthanga chuan tukin khan Sihphir Venghlunah MLA Fund atangin Sihphir Venghlun, Sihphir leh Nausel atanga Covid19 hrileng avanga eizawnna kawnga harsatna tawk leh hmeithai thenkhat thlanchhuahte hnenah Puanthui khawl leh tuizem (1000 litres) a sem.

Chief Minister chuan hripui leng avangin hun rei tak nunphung pangngai awm thei lo leh eizawnna pawh kalpui thei mang lo mi tam tak kan awm avanga economy in a tawrh phah thu a sawi a. India ramah pawh chhiah tlingkhawm a tlem phah a – state tin ten chhiah tlingkhawm atanga an chanpual an hmuh ngei ngei tur pawh an hmuh theih tak loh thu a sawi a. Chung bakah sawrkar laipui atanga hmuh tur dangte tam tak hmuh a nih loh thu sawiin, kum pangngai chu ni se hmasawnna hna hrang hrang thawkin hmachhawp te tihlawhtling turin hma lak theih tur kha beisei lawk loh harsatna hrang hrang avanga state hmasawnna a thuanawp phah thu a sawi a. Hun harsa karah pawh a rem chang awm chhun apiangah theih ang anga hma lak a nih dan te, tunlai boruakin ziaawm lam a pan zel hnu phei chuan beiseina nen theihtawp chhuahin hma lak zel a nih thu a sawi bawk.

Chief Minister hian vawiin hian Nausel, Sihphir Venghlun leh Sihphir a hmalakna hna thawh thenkhat leh hmalakna tur an thlen te chu a hmunah a enpui a. Khawtlang hruaitute leh mipuite nen inkawmna hun a hmanpui bawk a ni.