2792/2022-2023
Aizawl, the 24th November 2022: Vawiin khan School Education Minister Pu Lalchhandama Ralte chuan Lungsum Play Ground-ah Lungsum khua Kum 100 tlin (centenary) lawmna a hmanpui.

School Education Minister Pu Lalchhandama Ralte chuan he hunah hian thusawiin Pathian hruainain Lungsum khaw kum 100 tlinna (Centenary) lawm theih a ni chu lawmawm a tih thu a sawi a. Minister chuan Pathian hruaina avangin Lungsum chu kum za zeta upa a lo ni ve ta a, rilru put hmang leh thil thlir danah pawh Kum 100 tlin lawm thei tawh khua tih inhriaa rilru puitling zia put chhoh deuh deuh a ngai a ni a ti.

Minister chuan tuna Centenary Lawmna hian khaw mipuite inlungrual leh inhmangaih tawnna kan neih leh zual theih nan rah tha chhuah se a duh thu a sawi a, he khua hmasawnna ruhrel pawimawh tak pakhat chu Zirna hi a ni tih sawiin zirna lamah pawh nasa leh zuala tang deuh deuh turin a fuih bawk.

School Education Minister chuan hmar thimpui hi a thim reng dawn lova, chumi tur chuan hmasawnna hrang hrang atan hna chak takin thawh mek a ni a, ruahmanna pawh kawng hrang hrangin siam zel a ni a, chumi atan chuan Mizoram Sorkar pawhin sum tam tak a ruahman a ti a. Hmasawnna hrang hrang kal mekah hian beiseina thar nen an rilru put hmang leh ngaihtuahnate an hman thiam a tul tak zet tih a sawi bawk.

He huna khual zahawm Pu C.Lalnuntlanga, EM, Sinlung Hills Council pawhin thusawiin Lungsum khuaa tunhnaia hmasawnna hnathawh hrang hrang awm te sawiin , tui in tur thianghlim hniang hnar an neih theih nan hmalakna thui tak kalpui mek a nih thu leh a thawktu tur pawh thlan fel a nih tawh thu leh hriselna lamah pawh tun hnaiah Health Clinic hawn a nih tawh thu leh a thawktu pawh hemi khua a mi ngei lak a nih thute sawiin hma lakna nasa tak a awm avangin Mizoram sorkar chungah lawmawm a tih thu a sawi bawk.

Lungsum khua Kum 100 tlin lawmna inkhawm hi Pu C.Lalkhumtira, Organising Chairman-in a kaihruai a, lamthiam leh zaithiam tak tak ten hun an hmang bawk a. Tunhnaia Lungsum khua atanga chawimawi tlak mi thlanchhhuahte hnenah lawmpuina thuziak Citation hlan an ni a, tlai lamah hian Kum 100 tlinna lawmna ruai kilho a ni bawk.