2793/2022-2023
Aizawl, the 24th November 2022 : Vawiin khan Health & Family Welfare Department hnuaia World Bank Funded Project, Mizoram Health Systems Strengthening Project (MHSSP) chuan Mizoram chhunga mipui ten hriselna kawnga hma kan sawn theih nan leh Damdawi in hrang hrang - Primary Health Centre, Community Health Centre,Sub-Distrcit Hospital leh District Hospital- a Doctor leh Nurse thawk ten damlo enkawlna kawnga hma an sawn zel theih nan, mithiamte duanchhuah Clinical Knowledge & Skills Improvement (CKSI) App khuhhawnna hun a huaihawt.

Dr T.Lalhmangaihi, Principal Director, H&FW Department chu khuallian niin CKSI tlangzarhna hun hi a hmanpui a. MHSSP Project Director Dr. Eric Zomawia’n hun kaihruaiin, Project thil tum hrang hrang leh hmalak tawhna te a tarlang a. Dr. Lalnuntluangi, Deputy Project Director, MHSSP-in CKSI nihphung leh engtianga kalpui tur nge tih te, tu ten nge hmang anga tuin nge hlawkpui ang tihte kalkhawmte hnenah hrilhhriatna a nei a. CKSI app siamtute Tvasan atangin app chungchanga hriattur pawimawh leh a chhunga thil awm leh hnathawh dan te ngaihthlak a ni bawk. He hunah hian Health Department hnuaia hotu lian an tel kim hle a, World Bank Task Team atangin Senior Operation Officer, Amith Nagaraj, Elina Pradhan, Senior Health Specialist leh Consultants te an rawn tel bawk a ni

He app hi Doctor leh Nurse ten awlsam leh kimchang taka damlo enkawl dan tur online-a training an neih theihna tura duan a ni a. India ramah a vawikhat nan Mizoram-ah hman tan a ni dawn a ni. He CKSI app hi Doctor leh Nurse te hman tur a nih angin awlsam taka download theih turin Playstore ah “MHSSP Clinical Vignettes” tiin dah a ni a. He app hi Android-a hman theih turin peih fel a ni tawh a , IOS leh Web version-a hman theih tura duan mek a ni.

District thar pathum Saitual, Khawzawl leh Hnahthial ah te MHSSP kaltlang hian CMO office tur sak mek a ni a, Damdawi in ten kawng hrang hranga hma an sawn theih nan Internal Performance Agreement (IPA) hmangin sum an pe chhuak bawk a. Hospital, CMO Building thar leh Nursing Institute-te sak thatna turin hmalakna a kalpui mek a ni bawk.