2794/2022-2023

Sahmulphah thla ni 24, 2022: Vawiin khan Lawngtlai District Level Committee on SUMAN (Surakshit Matritva Aashwasan) chu a ṭum khat nan Lawngtlai DC Conference Hall-ah an Chairman, Lawngtlai Bawrhsap Pu Amol Srivastava hovin an ṭhu khawm.

Bawrhsap chuan Lawngtlai District-in hriselna leh kawng hrang hranga hma a sawn zel theih nan department hrang hrangte'n mahni zawnah theih tawp an chhuah ṭheuh tih sawiin, sawrkar ruahmanna leh hma lakna a hlawhtlin lehzual theih nan department hrang hrang inkara thawh hona leh inbiak pawhna ṭha zawk neih zel a pawimawh thu a sawi a. Department hrang hrangte'n an harsatnaah department dang puihna an mamawh chuan DC kal tlanga inhriattir zung zung ṭhin tur leh inhawng tlang taka indawr tawn ṭhin turin line department kal khawmte chu a chah a ni.

He ṭhut khawmah hian Member Secretary cum Convener Dr LP Malsawma bakah, health department, district administration, RD, ICDS, PWD, PHED leh I&PR department official-te leh tlawmngai pawl MHIP leh LWA ai awhte an tel a. Sr Medical Officer Dr S. Thaizi chuan SUMAN awmzia leh a kalpui dan tur tlangpui a sawi fiah a. Extended Mission Parivar Vikas (MPV) chungchang leh SUMAN nena kai kawpa hma lak dan tur a sawi fiah bawk a. Hemi hnuaia hlawhtling taka hma lak a nih theih dan tur hrang hrang sawi ho nghal a ni.

SUMAN hi ven theih natna laka nu leh nausen thihna a thlen tawh lohna tura Sawrkar Laipui hma lakna a ni a. Harsatna hrang hrang vanga nau chunga nu thihna leh nausen kum khat hnuai lam thihna thleng ṭhin venna tura hma lakna niin, hmeichhia naupai zawng zawng, nausen thla ruk aia upa lo pawm zawng zawng leh nausen kum khat hnuai lam zawng zawng chu he hma lakna hian a huam dawn a. He hma lakna hnuaia beneficiary-te'n zirtirna, ngaihsakna leh enkawlna ṭha tak an dawn a, hrisel ṭha taka an awm theihna turin ṭha zawka hma lak a ni dawn a. Lawngtlai District-ah chuan District Hospital Lawngtlai, Sangau PHC leh Bungtlang 'S' PHC-ah te he hma lakna hi kalpui hmasak phawt tum a ni.