1715/2024-2025\

Dated Aizawl, the 23rd August, 2024: Vawiin khan Pachhunga University College chuan National Institutional Ranking Framework ten India rama College tha 35-naa a thlan lawmna PUC Seminar Hall-a an buatsaih chu Chief Minister Pu Lalduhoma chuan khuallian niin a telpui a. Dr. Vanlalthlana, Higher & Technical Education Minister chu khualzahawm a ni. Pachhunga University College hi kum thum chhung a zawnin top 50 a an lanna a ni.

Thu a sawinaah Chief Minister chuan, Champhaiah Pre University College (PUC) harsa takin ka zir a, khawnvartui hmang Bati pawh kan la nei zo lova, Far ril chhiin lehkha ka zir thin. Chumi hnuah PA to CM ni chungin he college-ah hian ka zir zui ve a. Nitin hna kan tul avangin chhunah hun pangaiah college class ka kal thei thin lova. Chutiang chuan harsa takin he College ah hian ka graduate ve ta a ni, tiin PUC-a a zir lai chanchin tlangpui a sawi a. India rama college tha thlan chhuah zinga tel hial khawpa PUC in hma a lo sawn ta hi a ropui ka tiin ka lawm a. He dinhmun a thlen theih nana beitute zawng zawng chungah lawmthu ka sawi a ni, a ti. Zirna tha zawk Mizorama a awm theih nana a kaihhruai sawrkarin ruahmanna tlangpui a tarlang a; hriselna leh zirna lama sum sen hi kan sawrkar chuan expenditure ah kan ngai lova investment a ni, a ti. Mizorama leilung hausakna kan neih hrang hrang te chhawr tangkai turin Geology lama thiamna sang nei kan mamawh a, he college ah hian geology zirna a awm mek a, lo tang sauh sauh ang che u. Thalaiten mahni kea dinga hna an thawh suau suau na ram siam turin skill development uar zel ang u. Hand Holding Policy kan tan dawn hnai a, thawhpui tlak thalaite chu tumah thlei bik nei lovin Rs. 50 lakh thleng loan awlsam an lak theihna, interest free ni bawk si kan chhawp dawn a ni. Hetiang Policy nei state awmchhun hi kan ni mek a. He hmalakna chhawr thei thalai, mahni kea ding tlak thiamna nei, thawhpui tlak lo buatsaih ula, vawiina zirlaite pawhin chutiang mi chu nih rawn tum ang che u, tiin a sawm a ni. Eirukna leh thil tha lo tinreng laka inthiarfihlim turin a chah bawk.

PUC hian Chief Minister hi an college a lo zir tawh a nihna hrerengin thilpek an lo hlan a. Pu Lalduhoma hian 1976 khan PA to CM a nih laiin PUC ah hian Bachelor of Art tha takin a lo pass tawh a ni.

Dr. Vanlalthlana pawhin thusawiin, PUC thawktute zawng zawng chungah lawmthu a sawi a. In zarah NE India-a NIRF top 100 college nei thei awm chhun state kan ni a, kan chhuang em em a ni, a ti. Thalai lehkhathiam, chhawr tlak tam zawk chher chhuah tumin i bei sauh sauh ang u, tiin a sawm a ni.

Prof. H. Lalthanzara, Principal chuan kal khawmte lawmna thu a sawi, hun rei tak an lo beisei tawh PUC ram Land Lease tun hnaia sawrkarin a tihfelsak avangin lawmthu a sawi a, PUC dinhmun leh chanchin tlangpui a sawi bawk. PUC ah hian Arts, Science, Commerce leh Management stream zirna te awmin Under Graduate, Post Graduate leh Ph.D zirlai 2700 chuang an awm mek a ni.

Prof. Lalhriatzuala, Asst. Coordinator, IQAC chuan National Institutional Ranking Framework in tehfung hrang hrang hmanga zirna in tha an teh dan sawifiahna a nei a. NIRF chu Ministry of Education , Government of India in zirna in sang te that dan endiktu tura a thlan te an ni a. PUC hi kum 2018 khan an tel ve tan a, chutah chuan 101 leh 150 inkarah an awm a. A hnuah pawh top 100 ah an kai mai lova, kum 2022 ah khan ram puma 45 naah an tling chho ta a, kum 2023 ah 34 na niin kuminah 35 na an ni leh ta a ni. Kuminah hian ram chhunga college 3371 te an inel a, an zinga 182 hi NE India a mite an ni. NIRF-ah hian 100 thleng rank pek a ni a, chumi thleng pha lote chu rank band 101-150, 151-200 leh 201-300 te pek an ni a, college malin rank an nei tawh lo. India hmarchhaka PUC hnaih bertu Patkai Christian College chu 101-150 rank band-ah a awm a, college hlun tak St. Anthony's College chu rank band 201-300 ah a awm. Anni pahnih bakah Nowgong College (rank band 201-300) tih loh chu India hmarchhakah hian lang pha an awm lo.

Ranking lawmna inkhawmah hian Rev. Dr. Lalrokhuma Hmar, Head, History of Christianity Department, Aizawl Theological College chuan lawmthu sawina hunserh a hmang a, Prof. Vanlalchhawna, Finance Officer, MZU chuan Mizoram University aiawha thu sawiin Dr. Margaret Z. Khiangte, Vice Principal, PUC chuan lawmthu sawiin inkhawm a khar a ni.