Pune a awm mek Chief Minister Pu Lal Thanhawla chuan vawiin chhun khan New Institute of Rosary Education Group hotute sawmna angin an school thar ber, 10 an neihna chu a tlawh. New Institute of Rosary Education Group hian hmun hrang hrangah nursery atanga pawl 12 thleng zirna in school 9 an lo din tawh a. Vawiina Chief Minister ina a tlawh hi a 10-na a ni.

 Chief Minister an lo lawmna ah Pu Hawla hian hmeichhe zirtirtu leh thawktu 1000 rual hmaah thusawina neiin, Mizo te hi Mizoram buai hma a central service leh sipai officer a tam tak lut thei thin kha ram buai hnuah zirna a tlak hniam avangin tlingzo kan tlem phaha, chuvangin Mizoramah zirna tha leh changtlung kan duh avangin Education Reforms Commission, India rama a pahnihna hauh pha kan din a ni a ti a. A report pawh hman theih tura hmalak mek anih thu a sawi a. Mizorama mirethei zawkte chawikan nana flagship programme NLUP kalpui mekin rah tha a chhuah mek thu sawi bawkin, he policy hi UNO hnuaia Food and Agriculture Organisation (FAO) pawhin min rawn hriatpui tawh a ni a ti.

New Institute of Rosary Education Group Chairman, National YMCA Vice President ni bawk Pu Vivek chuan Mizoram tan Incubator 10 leh Mizoram mamawh tur iron tablet a pek tur thu Chief Minister hi a hrilh bawk a ni.

Chief Minister hian Pune a branch 26 nei, Seva Vikas Cooperative Bank pawh tlawhin, an Chairman chuan Chief Minister hnenah an Banka thawk turin Mizo thalai MBA Degree nei mi 3 tan hna a pek theih thu hrilhin, Mizo thalai MBA zir duh te tan education loan (finance) a pek theih thu a hrilh bawk a ni.

Chief Minister hi vawiin tlai hian Mumbaiah riak chhoin, naktukah Vashi, Navi Mumbai ah Mizoram House building tur lungphum a phum ang.

Chief Minister hi a nupui Pi Lal Riliani’n a tawiawm a ni.