Vawiin ni 28.2.2013 khan Agriculture Department Committee Room-ah Oil Palm Stakeholders Meeting neih a ni. He meeting, Dr. C. Lalzarliana, Agriculture Director kaihhruaiah hian Directorate of Oil Palm Research (DOPR)), Pedavegi, Andhra Pradesh atangin Dr. S. Arulraj, Director leh Principal Scientist 3 – Dr. P. Kalidas, Dr. M.V. Prasad leh Dr. B.N. Rao te an lo kal a. Mizoram atangin Oil Palm chinna District enkawltu District Agriculture Officer zawng zawng te, Oil Palm chingtute leh Mizoram Sorkar-in Oil Palm chin chungchanga thuthlung a ziahpui, Partner Company 3 – Godrej Agrovet Ltd., Ruchi Soya Industries Pvt. Ltd. leh 3F Oil Palm Agrotech Pvt. Ltd. te leh Agriculture Department-a Officer pawimawhte an tel a ni.

 He Stakeholders Meeting-ah hian Mizorama Oil Palm chin chungchanga hmasawnna hrang hrang te, a chi kuitiah leh enkawl te, a kung puitling tawh leh a rah enkawl dan te, leitha leh tui pek te, a rah seng leh a herna khawl Oil Palm Mill chungchang te uluk taka sawiho a ni a. Mizoram hmun hrang hranga Oil Palm dinhmun leh Oil Palm chingtuten harsatna an tawh te Power Point hmanga entir a ni a. Directorate of Oil Palm Research atanga lo kalte pawhin Oil Palm chin chungchanga hriattur pawimawh chi hrang hrang, a bikin Mizorama Oil Palm chin lama hmasawnna tur nia an hriatte he meeting-a lo kal te hnenah Power Point hmangin an entir a, chawhnu lamah Oil Palm Training an pe nghal bawk.

Directorate of Oil Palm Research hotute hian Mizorama an cham chhungin Mamit District-a Oil Palm chinte a hmunah an tlawh nghal a ni.