July ni 18 leh 19 chhung hian Mizoram Public Works Department chuan PWD Conference Hall, Tuikhuahtlang ah kum kalta chhunga an hnathawh hrang hrangte thlirhona - Review Meeting of Works an nei a. Chief Minister Pu Zoramthanga chuan vawiin chawhnu khan he Review Meeting kharna hi hmanpuiin, PWD Engineer te chu hma an lo lak tawh naah fakin an hmabak ah neitu rilru pu a thahnemngai taka thawk zawm zel turin a chah a ni.

Chief Minister chuan PWD ten hun chep tak karah leh Election Code of Conduct phuar na hnuaiah theih ang ang a hma la a, kawng chhe zual laite thawm that an thawh chu lawmawm a tih thu a sawi a. PWD Staff indaihlohna te leh khawl indaih lohna te chu a tahtawla phuhruk chhoh zel tum a nih thu a sawi bawk. Chief Minister in PWD Officers te fuih in, Zoram siam tha tur chuan tumruhna nen rilru sukthlek tidanglam a hma lak a tul thu a sawi a.  Kan kawng neihchhun te hi theih tawpa kan enkawl a kan cheithat phawt chuan kan hmel mawi tlan zelna tur a ni, a ti a. Kawng siamna tur lung chang tha a awm tam tawkloh avangin a remchanna apianga cement concrete a kawng siam uar ni thei se a ti bawk.

He hunah hian Commissioner & Secretary PWD, Pu. H.L. Rochungnunga chuan thu sawi bawkin a PWD inrelbawldan tha tiin, information chak taka hmun hrang hrang atanga pek a nih thin chu lawmawm a tih thu a sawi a. Sawrkar hnathawkte chuan sawrkar policy rinawm leh tha taka tipuitling turin kan ni tiin hming that leh chawimawina chu sawrkar chan tur a nih thu a sawi bawk.

Hun kaihruaitu Engineer-in-Chief, PWD Er. K. Lalsawmvela chuan PWD hmalakna kal mekte report pe nghalin, mamawh hrang hrang staff indaihloh thu leh kawng enkawlna atan khawl mamawh hrang hranf te Chief Minister hnenah hian a lo thlen a. Contractor te avanga hna tam tak a hun a zawh theih a nihloh thu a sawi lang bawk.

Kumin PWD Review Meeting of Works ah hian AE/SDO chunglam chu an tel kim hle a. Executive Engineer ten anmahni bialchhung hna thawh dan report in, sawihona neih zui a ni a. Working Division te atangin hnathawh kal lai mek dinhmun ngaihthlak a ni bawk. Tunhma an la neih ngai loh khawl thar Excavator (JCB), LPK Tipper leh Road Roller te an neih thar tak ten kawng an enkawlna kawnga a puih nasat thu Division EE ten an sawi. Division EE tam zawk in Field Staff an indaihloh avanga Work Supervision-ah harsatna an neih thu dawn a nih bakah Maintenance khawl chi hrang hrang - JCB, Road Roller, Tipper leh Mini Hot Mix plant mamawh belh dan te sawi a ni.
 
Mizoram PWD hian central leh state scheme hrang hrang hnuaiah kawng, lei leh in sak, siam leh enkawl hna an thawk a. PMGSY hnuaiah hna 204 thawh tawh nin hna kal lai 121 a awm a. NABARD hnuaiah kawng siam mek 13 (belhkhawm in 404.50 km) an nei a ni. NEC hnuaiah hian kawng siam mek pahnih (201.40 km) neih niin, building hnathawh pakhat a awm bawk a. National Highway kawng siam mek 10 awmin, enkawl zat hi 11 a ni. Asian Devel Bank hnuaia kawng 1 siam mek ni bawkin, 78.80% thawh zawh tawh a ni a, World Bank tanpuina in kawng 3 siam nei ni bawkin hengte hi 61.7% zawh tawh a ni. Central Road Fund hnuaiah kawng 4 (59.37 km) siam mek a ni a, NLCPR hnuaiah kawng 1, 12km a thui siam ni bawkin, NEDP hnuaiah kum 2018-19 chhung khan hna hrang hrang 152 leh lei 27 thawmthatna turin 220.32 crore dah a ni. PWD Vision 2030 chuan kum 2030 hma in Mizoram chhunga lei zawng zawng chu permanent bridge a thlak vek a tum a. Hemi atan hian hma lak mek a ni. MPWD hian building (residential leh non-residential) enkawl 3201 a nei mek a ni.