Vawiin khan Mizoram Chief Minister Pu Lal Thanhawla chuan Aijal Club Conference Hall ah Rajiv Gandhi Study Circle a hawng.

Pu Lal Thanhawla chuan Rajiv Gandhi chu thalaite tana khawvel thar siam ngai pawimawh tu, information technology lama hmathlir thui tak nei, ram sum leh pai dinhmun siamtha tura sumdawngte zalenna Liberalization Privatization Globalization(LPG) pawimawhzia hretu a ni, a ti a. Kum zabi sawmhnihna-in technology lama hmasawnna nasa tak a put luh nghakhlel bertu zinga mi, hmasawnna atana thalaite pawimawhzia hria a, hma thlir thui tak nei mi a nihzia a sawi a. A dam chhungin a hmathlirte ti hlawhtling hmanlo mahse a hnu a lo kal sawrkarte’n Rajiv Gandhi beiseina tam tak an tihhlawhtling a ni, a ti. Chief Minister chuan Rajiv Gandhi chu Mizoram Peace Accord ziahna tura mi tangkai a nih zia tarlangin khatih hunlaia sawrkar laipuia mi tam zawkin ‘helna in lukhawng a nei tur a ni lo’ tih ngaihdan nghet tak  an neih lai khan remna tluantling siam duhtu Rajiv Gandhi avangin Mizoramin remna kawng chak takin a zawh theih phah a ni, a ti a.  Chief Minister chuan Mizoram Peace Accord ziah a nih hnua a lawm tura chhungkuaa lo zin Rajiv Gandhi-te nen Mizoram dung leh vang an fanna chanchin sawiin Mizo hnam nunphung, hnam tha leh thalo inthliarna awmlo, inunauna leh inpumkhatna tha taka vawng nung rengtu kan nihna a hmuhin a ngaisang a, India ram hmun dangte pawhin entawn thei hial se a duh thu a sawi a ni, a ti.

Kum 1987 a Mizoram a tlawh tumin Mizote fuihna thu a sawiah Pu Rajiv Gandhi khan “Sum leh pai leh khawvel thila hlawkna umin Mizo hnam nunze mawi hi in hralh tur a ni lo. Pakhat hralha, a dang in lei a nih chuan hmasawnna khingbai a ni a. Hmasawna tluantling erawh chuan mihring mamawh sum leh pai leh thil dangte bakah rilru, taksa leh hnam nunphung engkima hmasawnna a huapzo vek a ni” tiin Mizote a fuih a. He thu hi Mizoram Chief Minister chuan Rajiv Gandhi Study Circle hawnnaah sawi chhuakin he Study Circle hian Mizo thalaite thinlungah Rajiv Gandhi-a ngaih pawimawh hnam nunzemawi hlutna, hmasawnna huapzo, sakhaw zalenna, khawtlang nun siam that leh mipui sawrkarna chawisante chu nghet takin tuh ngei se a duh thu a sawi a ni. 

Rajiv Gandhi Study Circle hi tlawmngai pawl (NGO) niin kum 2005 khan din a ni a. Zirlaite leh thalaite thinlungah India hnampa Mahatma Gandhi leh Pt. Jawaharlal Nehru te hmathlir tuha, thalaite pawimawhzia hmuchianga an khawvel su eng tura beitu Rajiv Gandhi-a’n ‘Twenty first century India’ a hmuhlawk ang ngeia thalaite rilru ti engtu nih chu a tum ber a ni.  RGSC hi India ram State leh District hrang hrangah din niin University leh College campus engemawzatah hawn a ni tawh bawk a ni. 

Study Circle hawnna inkhawm hi Pu H.Vanlalkeuva, City Co-Ordinator-in a kaihruai a. Mizoram State Co-Ordinatior Dr. Suwa Lal Jangu pawhin thu a sawi a ni.