Tukin zing khan Sipai Lammualah Chief Minister Pu Lal Thanhawla chuan ram pathum - India, Myanmar leh Bangladesh ramchhung, motorcycle chuanga fangkual mek, sipai 33 awmna, Assam Riffles  Tri-Nation Motorcycle Expedition team chu Myanmar lama fehchhuak turin a vailiam.

Chief Minister Pu Lal Thanhawla chuan Hmarchhak bial venghimtu rinawm tak, Assam Riffles team ten motorcycles hmanga India hmarchhak state 6 bakah Bangladesh leh Myanmar tlawh kuala, inthianthatna leh inpawhna tha zawk siam tuma an fehchhuak chu lawmawm a tih thu a sawi a. He hun hi hmarchhak bial chhunga hmunmawi tak tak te khualzinte hip tura puanchhuahna hun remchang a nih thu a sawi a ni. Chief Minister chuan India tan Myanmar leh Bangladesh chu thenawm ram zingah pawh a pawimawh zual bik an nih nih thu leh India tana 'Strategic partners' an ni tih a tarlang a. Assam Riffle Motor Cycles team te chu Myanmar an va thlen hun in ram aiawha palai hna thawk tu leh remna leh muanna atana penchhuak  an ni tih hre tur leh ram pahnih kara inthianthatna thuk zawk siam turin an hun han hman chhoh tur te pawh hmang tangkai  turin a chah a ni.

Assam Riffles  Tri-Nation Motorcycle Expedition team hian kum  in October ni 30 khan Shillong atangin an zinkawng an tan a, Bangladesh leh India hmarchhak state 5 te an tlawh hnuin Mizoram chu Vairengte atangin an rawn lut a. Tukin khan Myanmar lam chu Champhai kawng zawh in an pan leh dawn a. Tunthla ni 22 khian  Assam Riffles  Tri-Nation Motorcycle Expedition team te hian an hmachhawp, Km 2150 a thui zinkawng zawh chu an zo dawn a ni.  Brig MS Mokha, DIG, 23 Sector Assam Riffles in a sawi dan chuan - Assam Riffles  Tri-Nation Motorcycle Expedition  chu India, Myanmar leh Bangladesh ramri vengtu sipai te inkara inthianthatna ti nghet tur leh Indopui pahnihna bakah Indo-Pak War 1971 a martar te  zahna lantirna atana buatsaih a ni a. Assam Riffles  Tri-Nation Motorcycle Expedition team te hian an kalna hmun apiangah thalai, zirlai, Sipai martar chhungte leh Ex-Servicemen te kawm in hun an hmanpui dawn a ni.

Tukin Sipai Lammual a Assam Riffles  Tri-Nation Motorcycle Expedition team thlahna hunah hian DGP Pu Thianghlima Pachuau bakah Civil Official leh Army Officer te, sipaiho leh zirlaite an tel a. KTM Riders ten Assam Riffles  Tri-Nation Motorcycle Expedition team hi Selling thleng an thlah chho dawn a ni.