Vawiin khan Kolasib Cluster a Commerce & Industries Department hnuaia NLUP beneficiary  62 te hnenah 4^th Phase Final Installment tanpuina sem a ni.

He hun ah hian MIFCO Chairman leh Kolasib bialtu MLA ni bawk Pu PC Zoram Sangliana chu khuallian niin tanpuina hi a sem a. Semna inkhawm ah hian khuallian chuan thu sawiin Sawrkar Flagship Policy NLUP chu mi tam takin nuih zat thin mahse mi rinawm leh taima te chuan an hlawhtlinpui a ni tiin mi harsa zawk leh chhumchhia tam takin lei rem an rah phah a ni a ti. Tun tuma tanpuina dawngtute pawh rinawm tak leh taima taka hma la turin a chah a an tharchhuah/ thawhchhuah atangin Pathian chanpual sawm a pakhat pe ngei turin a chah bawk a, mahni leh chhungkaw mamawh an phuhru theih nana tanpuina chu hmang tangkai leh hlawhtlinpui ngei turin duhsakna a hlan bawk a ni. Khuallian chuan NLUP chu a tawp mai dawn loa, kut hnathawktuten an tharchhuah/thawhchhuah te chu man man zawka an deh ral theihnan NLUP tuam hlawm nan Sawrkarin NEDP chu a duang a ni a ti a, NEDP hnuaiah hian hmasawnna ruhrel tamtak bakah link road te pawh siam tum a ni tiin, Kolasib khawpui chhung ngei ah pawh khawpui chei nan leh multipurpose hall sak nan te pawh hmalak mek a nih thu a tarlang bawk.

He hun ah hian Industries hnuaia Trade hrang hrang 7 heng Automobile Works, Black-Smithy, Electronic Repair, Handloom, Leather & Hood Works, Petty trade-1 leh Tailoring thlangtu mi 62 te hnenah tanpuina sem a ni a, tanpuina sem hlut zawng hi cheng 1,801,620/- hu a ni. Industries Department hotute hnen atanga thu kan dawn danin Commerce & Industries Department chu Mizoram pumpuiah Beneficiaries ngah ber niin Kolasib Industries Sector hnuai ah pawh khaw hrang hrang 46 atangin mi 1662 te hnenah tanpuina pawisa fai cheng 1,454,09,225/- (nuai sangkhat zali sawmnga pali sangkua zahnih sawmhnih panga) sem chhuah tawh niin, Bungrua sem atanga record an neih chu Puanthui khawl set 212 (set 1 ah khawl 3 zel), Thingzai khawl 195 leh Auto Rickshaw 78 sem chhuah tawh bawk a ni.