Assam Rifles te chuan an din champhaphak vawi 183-na pualin Tri-nation Motorcycle Expedition an buatsaih a. October ni 30, 2017 khan Shillong atanga rawn chhuak in, nimin tlai khan Aizawl an rawn thleng a. A hmuahna inkhawm AR Ground, Lammuala ‘Flag in Ceremony’ buatsaih ah, Mizoram Governor Lt. Gen. (Retd.) Nirbhay Sharma PVSM, UYSM, AVSM, VSM chu Khuallian a ni.
Governor chuan Assam Rifles te’n Sardar Vallabhai Patel Unity & Heritage Motorcycle Expedition an buatsaih chu lawmawm a tih thu a sawi a. Expedition-a tel te chu an vanneih thu sawiin, Assam Rifles tana thil chhinchhiah tlak a nih thu a sawi a ni. Kan thenawm ramte nena inlaichinna tha siamtu a nih bakah hmarchhak biala chengte impumkhat tirtu nise a ti a. Heng ram pathuma ramri vengtute inkarah pawh thawhhona tha a awm phah ngei a beisei thu sawiin, an kal zelna turah duhsakna a hlan nghal a ni.
23 Sector Assam Rifles DIG Brig. MS Mokha, SM chuan expedition ngaihtuah chhuah a nih dan leh huaihawt tura hmalak ngaite an bawhzui dan a tarlang a. Col. Pratyush Kumar Singh Gaur, Expedition Team Leader pawhin expedition intanna Shillong leh Aizawl inkara an thil tawn te a tarlang bawk a ni.
He hmuahna inkhawmah hian CYMA leh 46 Assam Rifles Jazz Band te chuan lam leh zai an entir a. Aizawl KTM leh Outlaws’ 13 te’n Aizawl luh hmain an lo hmuak bawk a ni. Heng mi 33 te hian bike-in India hmarchhak state - Meghalaya, Assam, Manipur, Nagaland, Mizoram and Tripura te bakah Bangladesh leh Myanmar an tlawh dawn a, ni 19 chhungin km 2150-a thui an tlan dawn a ni.
