Vawiin zing dar 6.30 khan Assam Rifles Sardar Vallabhbhai Patel Unity and Heritage Tri- Nation Motorcycle Expedition hnuaia huaihawt "Run for Fun" chu Home Minister Pu R. Lalzirliana'n AR Ground-ah a vailiam a. Run for Fun ah hian mipui thahnem tak telin Home Minister Pu R. Lalzirliana hovin km 4 an tlan a. Lammual atanga tlan tanin sikulpuikawnah an kuala, lammualah an let leh a ni.

Home Minister Pu R.Lalzirliana chuan Assam Rifles ten Sardar Vallabhbhai Patel Unity and Heritage Tri- Nation Motorcycle Expedition an buatsaih leh an ram tlawhte zinga Mizoram a tel ve chu lawmawm a tih thu a sawi a. Run for fun chu Tri-nation Motorcycle expedition tihlawhtlingtu pakhat anih thu sawiin Minister chuan hriselna atana taksa insawizawi a pawimawh thu leh zing tlan te uar lehzual a tul thu a sawi a. Tri-Nation Motorcycle Expedition team te ram dang tlawha an la kal leh zelna turah duhsakna a hlan bawk a ni.

He hunah hian Run for Fun a tel titha zualte hnenah Home Minister hian medal a sem nghal a. Naupang kum 18 hnuai lam mi 9, puitling kum 18 leh 40 inkar mi 6 leh puitling kum 40 chunglam mi 6 hnenah medal hi hlan a ni.

Assam Rifles Tri-Nation Motorcycle Expedition hi October ni 30, 2017 khan Meghalaya atanga tan niin Expedition team member 33 te chuan ni 20 chhungin Bangladesh, Myanmar, Meghalaya, Assam, Tripura, Mizoram, Nagaland leh Manipur an tlawh dawn a. A pumpuiah km 2150 an tlan dawn a ni. Expedition team te hian Meghalaya atanga tanin Bangladesh, Tripura leh Mizoram an tlawh tawha Myanmar, Manipur, Nagaland leh Assam an la hmabak a. November ni 17, 2017 hian Shillong thleng leh hman tura ruahman a ni.

Assam Rifles Tri-Nation Motorcycle Expedition hian a tum ber chu ram hrang hrang an tlawhte zingah inlaichinna leh inthianthatna, remna leh hmasawnna a awm zel theih nan a ni.