Nimin chawhnu khan Pu Benjamin Lalzama, Additional DC Lunglei kaihhruaina in a Office Chamber-ah Tlabung Sub-Divisional Hospital, Lungsen Primary Health Centre leh Bunghmun Primary Health Centre huamchhunga hri danna pek beihpui thlak - Intensified Mission Indradhanush hmalakna kalpui zel dan tur an rel. 

Dr Lalrinthangi,SMO Lunglei District leh District Immunization Officer ni bawk chuan report pe in Sawrkar laipui ruahmanna siam angin naupang kum hnih hnuailam leh nu nau pai te hnenah hri danna a huamzau thei ang berin Intensified Mission Indradhanush Phase I Round I ah pek an ni, a ti a. Intensified Mission Indradhanush hnuaiah hian Lunglei District huamchhunga khaw 13-ah hri danna (vaccine) pek beihpui thlak hi kalpui mek a nih thu a tarlang bawk. Tun dinhmunah heng khaw 13-ah hian naupang kum 2 hnuailam target mi 71 neih ah mi 78 hnenah vaccine pek an ni a, nu nau pai target 31 neihah 24 hnenah vaccine pek a ni bawk.

Intensified Mission Indradhanush Phase I Round II hi November ni 7 atanga kar khat chhung kalpui leh tur a ni a. He hmalakna ah hian 1^stAssam Rifles – in Health Department thawktute an tawiawm dawn a ni.

Intensified Mission Indradhanush hi ram pum huap hmalakna niin Kum 2018 December ral hmaa India ram puma naupang kum hnih hnuailam leh nu naupai 90% in hri danna (vaccine) an dawn kim hman theihna tura duan a ni a. October 2017 atangin thla li (4) chhungin khaihlak awm lo a inzawm patin India Hmarchhak district 52 atanga hmun thlan bik 166-ah leh India ram state 21-a thingtlang khuaah te kalpui a ni ang.