Vawiin khan Ruallung Khua Field-ah ‘Thalfavang Kut’ hman a ni a, Ruallung Khua buatsaih a ni. He hunah hian Home Minister Pu R. Lalzirliana chu Khuallian a ni a. Minister of State Pi Vanlalawmpuii Chawngthu chuan Home Minister hi a tawiawm a ni.

Home Minister chuan kut hlimawm tak buatsaih a ni chu lawmawm a tih thu a sawi a. Khawpui zawka pem chhuak ten theihtawp chhuahin an khua tan an thawk hi Ruallung vanneihna a ni, tiin midang tana thil tha titu nih hi a pawimawh a ni, a ti a. Zirna chungchang sawiin zirna in tam neih ai chuan zirna tha leh quality sang neih a pawimawh zawk a ni tiin zirlai tha leh ram tana mi tangkai chherchhuah theihna tur buatsaih a tul a ni, a ti a. Police hna lak tur pawh dik taka lak tum a nih thu sawiin, exam a titha apiang lak an nih tur thu a sawi a. Paper en dikna kawngah pawh fair taka tih tum a nih thu a tarlang a. Police hna nilo hna dangah pawh diltuten rilru puitling tak pu chungin mahni thiamna hmang ngeia tlin kan tum tur a ni, a ti a. Thalfavang Kut buatsaih a ni chu zawngchhang tlak a tih thu sawiin kan mizo culture chawisanna kawng pakhat a ni, a ti bawk.

Minister of State, Pi Vanlalawmpuii Chawngthu chuan Ruallung khua atanga pem chhuak tawh ten mahni khaw chhuahna ngai pawimawh a, ngaihsan nachang an hria chu chhuanawm a tih thu a sawi a. Khaw dang tan pawh an entawntlak hle a ni, a ti a. Hmeichhiate tana hamthatna hrang hrang te chu kan hriatchian bakah kan hman tangkai a ngai a ni, tiin kalkhawmte a fuih a. Kut hlimawm tak hmang turin duhsakna a hlan nghal a ni.

Programme hi Ruallung Khawchhuak Welfare (RKW) Chairman, Pu R. Lalthatluanga chuan kaihruaiin  Thalfavang Kut Organising Committee Chairman Pu Lalnunkunga Sailo chuan inlawmna thu a sawi a. RKW General Secretary, Pu K.L.Liannghaka atangin report ngaihthlak a ni a. Ruallung khawchhuak mi hlawhtling hmasa Pu K. Thanhlira leh a nupui Pi Haukhumi te chu Kut Nu le Pa atan ruat niin Pu K. Thanhlira’n thusawina hun a nei a. VCP Pu H. Zarzoliana’n thusawina hun a nei bawk a.  Kum 80 chunglam thilpek hlanna neih niin Ruallung Khawchhuak mi hmingthate chawimawina hun neih a ni a. Item hrang hrang entir a ni a, chungte chu – costume parade, live band, solo bakah hnam lam hrang hrang entir a ni bawk. Ruallung Branch YMA President Pu. H. Lalhmangaihzuala chuan lawmthu sawina in hun a khar a. Programme hi Kut ruai in a zui a, zan lamah Concert a awm bawk a ni.

Kut hi ni hnih awh niin November Ni 2, 2017 khan tan a ni tawh a. November Ni 4 hian Thalfavang Kut pualin Free Clinic a awm dawn a ni.