Tukin zingkar khan Chief Minister Pu Lal Thanhawla chuan Ramhlun Indoor Stadium a tlawh a, a building dinhmun te enfiahin bialtu Minister Pu H.Liansailova leh Sports Minister Pu Zodintluanga te nen a sak that dan tur te an thlir ho.

Inkhawm hun tawite neih ah Chief Minister chuan thusawiin sorkarin thalaite tan khawvel thar dinsak chu a ngaihpawimawh thu a tarlang a. Sports Minister chak tak kaihhruaina hnuaiah 'Catch Them Young' policy kalpuiin infiamna hmun tha leh changtlung zawk hmun hrang hranga din tura chak taka hma lak mek a nih dante a sawifiah bawk. Thalaite hmakhua ngaihtuahsakin N.I.T., Mass Communications, Management leh Medical College te din tura hmalak mek a nih thu te a sawi a. Ramhlun Indoor Stadium chu tunhmaa Indoor Stadium awmchhun a nih avanga hman tangkai a nih thin dan te sawiin a siamthat hna pawh rang taka thawh chhoh a nih tur thu te a puang bawk a ni.

Bialtu Minister Pu H.Liansailova chuan Aizawl North huam chhunga vantlang inkhawmna lian tham an neih loh thu leh thalaite tan pawha indoor infiamna an tlakchhamna chuan an bial a tihthuanawp thu sawiin, chumi ngaipawimawha Chief Minister leh Sports Minister ten chak taka hma an laksak avangin an hnenah lawmthu a sawi bawk. Sports Minister Pu Zodintluanga chuan thalaite hmakhua ngaihtuah em em tu Chief Minister an neih avanga thalaite vanneihzia sawiin Ramhlun Indoor Stadium siamthat hna chu chak taka bawhzui chhoh a nih tur thu a sawi.

Ramhlun khawtlang leh tlawmngai pawl hrang hrang hruaitute chuan Hall ruak hmun chu thalai awm tha duh lo ten tawmruk nana an hman thin thu leh chumi veng tura khawtlang hruaitute an hah phah zia te an sawi ve a, sorkar hotu ten Hall sak that nana hma an laksakna avangin lawmthu an sawi bawk a ni.

Chief Minister hi MIFCO Chairman Pu C.Lalruata, Sports Secretary Pu P.Lianhrima, Sports Department   Director Pu Zoliana Royte bakah khawtlang hruaitu ten an tawiawm a ni.