Vawiin khan Art & Culture Minister Pu P.C. Zoram Sangliana chuan a pisa-ah Pu P. Rohmingthanga IAS (Retd.) ziah lehkhabu 'Compendium of Standing Orders of the Superintendents of Lushai Hills 1904 - 1921' a tlangzarh. Tlangzarhna ah hian Pu K.Lianzuala MLA, Chairman Mizoram KVI Board  leh Pi L. Tochhong Principal Secretary  te leh Indian National Trust For Art and Cultural Heritage (INTACH): Mizoram Chapter hruaitu thenkhatte pawh an tel a ni.

Tlangzarhna ah hian Pu P. Rohmingthanga chuan lehkhabu a buatsaih dan chanchin a sawi a. A copy hmasa ber 1973-a Aizawl DC a nih laia a buatsaih dan sawiin he lehkhabu chhungah hian Mizoram history tam tak a awm a ti a, Zoram tan 'heritage' tling pha a nih thu a sawi a ni..

Pu Zoram Sangliana chuan lehkhabu hi tlangzarh in Mizo thangtharte leh historians te tan lehkhabu hlu tak, record behchhan tlak tak leh zir peih tana zir tur tamtak awmna a ni a ti a. He lehkhabu a lo chhiar atang hian hmanlaia sawrkar hna thawkte lo hahzia te, pisa an vawn zahawm zia te, neitu nihna an lo hauh thiamzia te sawiin, tunlai miten entawn tur kan ngah zia leh amah ngei pawh tihtur leh bat tamtak a siamsak nia a hriat thu a sawi. Mizo pasaltha te chanchin te, Mizo dan leh hrai hrang hrangte hi Hindi emaw, English emawa kan ziah loh chuan Mizo tawng chhiar thiam lo hnamdangten min hriatpui thei lo a, Mizote min hmelhriat tak tak thei lo a ni a ti a. Pu Roa te ang mi thil chik leh ram leh hnam vei mi Pathianin kan ram tana min pe hi a lawmawm a ni a ti bawk.