Vawiin chawhnu dar 1 khan I&PR Conference Hall-ah Inter Media Publicity Coordination Committee (IMPCC) chu an thukhawm a, May thla atana thupuia thlan Disaster chungchang mipui hriata puanzar a nih dante leh mipui tana department hrang hrangte hmalak mekna te an thlirho. Pu Lalchungnunga, Station Director, AIR kaihhruai meeting ah hian Biogas (bawng ek) hman pawimawhna te, Rubber hlawhtling taka chin dan te leh Malaria laka inven ngun a pawimawhna te uar taka mipui inzirtir rel a ni a, June thla thupui atan - 'Malaria i do ang u' tih chu an thlang nghal bawk. Mizoram ah hian Malaria avanga thi kan la tam em em a, DDT-a chenna in kahtir a tangkaizia leh a hlauhawm loh dante pawh uar zawka mipui hnena inhrilhfiah a tul dan te sawiho a ni. June thla chhung hian mipui hamthat nana sorkar laipui hmalakna hrang hrang inhrilhhriatna beihpui - Public Information Campaign on Bharat Nirman / Flagship Programme tum 12-na chu ni 22 June ah Haulawng ah, ni 24 June ah Tawipui  South ah leh ni 25 June ah Zobawk ah te hman tura ruahman a nih thu report a ni bawk.